17.07.2015. Зуҳра Раҳимова Хоразм вилоят “Она ва бола” скрининг маркази бошланғич касаба уюшма қўмитаси раиси. Ўз касбининг моҳир устаси, билимдон шифокор, фидойи бу аёл “Ishonch” газетасининг фаол муаллифларидан. Унинг тиббий маданиятни юксалтириш, она ва бола саломатлигини мустаҳкамлашга доир қатор мақолалари муштарийлар томонидан илиқ кутиб олинган. Марказ ходимлари ҳаётида касаба уюшмасининг ўз ўрни бор. Бошланғич ташкилот томонидан маъмурият билан ҳамкорликда ходимларни моддий ва маънавий рағбатлантириш, бўш вақтларини мазмунли ўтказишга алоҳида эътибор қаратиб келинмоқда. Ходимлар, айниқса, “Маънавият соатлари”ни интизорлик билан кутишади.
— Шифокор, айниқса, оналар ва болалар саломатлигини назорат қилувчи мутахассис дунёқараши кенг, янгиликлардан бохабар, маънавиятли шахс бўлиши лозим, — дейди касабақўм етакчиси. — “Маънавият соатлари” ҳамкасбларимизда ана шу жиҳатларни янада юксалтиришда муҳим аҳамият касб этмоқда.

З. Раҳимова бошчилигидаги Хоразм вилоят “Она ва бола” скрининг маркази касаба уюшма ташкилоти “Энг намунали бошланғич ташкилот” кўрик-танловининг Хоразм вилоят  босқичида юз нафаргача ходимлар хизмат қилувчи ташкилотлар ўртасида соғлиқни сақлаш ва фармацевтика тармоғи бўйича  биринчи ўринга муносиб деб топилди.

— Касаба уюшма ҳаракатини ташкилий жиҳатдан мустаҳкамлаш, шунингдек, меҳнаткашлар ўртасида касаба уюшмаларининг мавқеини ошириш, моддий-техника базасини кучайтириш, илғор иш тажрибаларини оммалаштириш, жамоанинг ижтимоий-иқтисодий  ривожланишида бошланғич касаба уюшма ташкилотларининг фаол иштирокини таъминлаш, касаба уюшма органларида ишловчилар ҳамда фаолларнинг ижодкорлик, ташаббускорлик қобилиятини шакллантириш мақсадида  Хоразм вилоят касаба уюшма ташкилотлари бирлашмаси  томонидан зарур тадбирлар амалга оширилди, — дейди вилоят   касаба   уюшма   ташкилотлари  бирлашмаси ташкилий ишлар бўлими мудири  Озод Отажонов. — Натижада кўрик-танловда 1700 га яқин бошланғич ташкилотларнинг  иштироки таъминланди. Вилоят босқичида 100 нафаргача аъзони бирлаштирган ташкилотлардан 18 таси, 100 нафардан зиёд аъзоси бўлган ташкилотлардан 15 таси қатнашди.

Касаба уюшма қўмиталари томонидан ташкил қилинган кўргазмалар муносиб баҳоланди. Тармоқлар бўйича ғолиб деб топилган  бошланғич ташкилотлар   диплом ва совғалар билан  тақдирланди.

Шунингдек, кўрик-танловда “Энг чиройли кўргазма ташкил  қилган  бошланғич ташкилот”, “Ғалабага бўлган ишончи” учун номинациялари бўйича ғолиб деб топилган бошланғич ташкилотлар ҳам рағбатлантирилди.