14.09.2016. Жумладан, «Касаба уюшмалари — хотин-қизларга» акцияси доирасида чекка қишлоқларда яшовчи ва таълим муассасаларида фаолият юритаётган эҳтиёжманд ходимлардан 6 нафарига электр-маиший техника жиҳозлари тақдим этилди.

— Эътибордан бошимиз осмонга етди, — дейди «Қутчи» ҚФЙ Зачкана қишлоғидаги 41-умумтаълим мактабида ишловчи Маҳбуба Эшбобоева. — Касаба уюшмаларининг фаолият қамрови кенгайиб, ишончли суянчимизга айланиб бораётганидан хурсандмиз.

«Касаба уюшмалари — болаларга» акцияси доирасида эса ходимларнинг 275 нафар фарзанди Ваҳоб Бердиев номли ва «Зиё чашмалари» оромгоҳларида соғломлаштирилди. Туман кенгаши томонидан «Зиё чашмалари» оромгоҳида спорт тадбири уюштирилиб, ғолиб ва совриндорлар муносиб тақдирланди.

Ўрта махсус касб-ҳунар коллежларида таҳсил олаётган иқтидорли ўқувчилардан Наргиза Хўжақулова ҳамда Ўктам Қудратовга махсус рағбатлантирувчи стипендия ажратилди. 120 нафар ижтимоий ҳимояга муҳтож оила фарзандларига ўқув қуроллари топширилди. Шунингдек, 35 нафар бемор ходимлар ҳолидан хабар олинди. Тармоққа қарашли касб-ҳунар коллежларида ишловчи 200 нафар педагогнинг Самарқанд ва Бухоро шаҳарларига саёҳати ташкил этилди.

74 нафар педагог республикамизнинг турли сиҳатгоҳларида ўз саломатлигини тиклади. Бундан ташқари, анъанавий август анжуманида ўз касбининг моҳир эгаларидан 70 нафарига туман кенгашининг қимматбаҳо совғалари берилди. Бошланғич ташкилот етакчиларидан 40 нафари рағбатлантирилди.

Алоҳида таъкидлаш жоизки, Ўзбекистон Республикаси давлат мустақиллигининг 25 йиллиги муносабати билан 8 та янги иш ўрни яратилди. Жумладан, коллеж битирувчиларидан Маржона Носирова, Моҳигул Маликова, Юлдуз Умарова, Фотима Ёқубова, Санжар Қиёмов, Миржалол ўуломов, Адҳам Бобоқулов ва Хумора Раҳматова касаба уюшмалари ажратган фоизсиз кредит ҳисобига ишли бўлишди.