Previous Next

24.05.2022. Ўзбекистон энергетика, нефт-газ ва геология ходимлари касаба уюшмаси Республика кенгашининг 2022 йилда ёшларга оид сиёсатини амалга ошириш юзасидан чора-тадбирлар дастурига мувофиқ жорий йилнинг 20-21 май кунлари Республика кенгаши томонидан тизимдаги корхоналарда меҳнат қилаётган ишчи-ходимлар оилалари ўртасида “Спорт-мустаҳкам оиламиз пойдевори” шиори остида оилавий спартакиаданинг финал босқичи бўлиб ўтди.

Спартакиадани ўтказиш жараёнида тармоқ тизимидаги корхона, ташкилот ва муассасаларда меҳнат қилаётган 400 дан ортиқ оилавий жамоалар қамраб олинди. Спорт мусобақси уч босқичда, 1-босқич жорий йилнинг март-апрель ойларида корхона ва ташкилотлар кесимида, 2-босқич апрель-май ойлари давомида акциядорлик жамиятлари тизимидаги корхона ва ташкилотлар ўртасида ўтказилиб, спартакиаданинг Республика босқичи
20-21 май кунлари Тошкент вилояти Қибрай туманида жойлашган “Энергетиклар” сиҳатгоҳида ўтказилди.

Спартакиаданинг финал босқичида республикамизнинг барча ҳудудларидан ташриф буюрган энергетика, нефт-газ ва геология тармоғида меҳнат қилаётган 13 та ёш оилавий жамоалар иштирок этди.

Республика оилавий Спартакида мусобақаларида корхона ва ташкилотларнинг меҳнаткашлари ҳамда уларнинг оила аъзолари спортнинг 6 та тури бўйича беллашдилар. Жумладан,

1. Югуриш, акробатика элементлари ва тўпни нишонга отиш;
2. “Чаққонлик ва мерганлик” эстафетаси;
3. “Моҳир ҳужумчи”;
4. “Овчилар ва қуёнлар” ўйини;
5. “Қаддимизни ростлаймиз, сакрашни боплаймиз”;
6. Кўпкураш мусобақалари.

Спорт мусобақасида 1-ўринни “Ўзбекгеофизика” АЖ номидан иштирок этган Шарофутдиновлар оиласи, 2-ўринни “Сирдарё ИЭС” АЖ номидан иштирок этган Бобокалоновлар оиласи ва 3-ўринни “Ҳудудгазтаъминот” АЖ Жиззах филиали номидан иштирок этган Эргашевлар оиласи эгалладилар. Ғолиблар диплом ва пул мукофотлари билан тақдирландилар.

Шунингдек, “Энг чаққон оила”, “Ғалабага бўлган интилиши юксак оила”, “Энг аҳил оила” ва “Энг фаол оила” номинациялари бўйича ҳам оилалар ғолибликни қўлга киритдилар. Бундан ташқари қолган барча иштирокчилар касаба уюшмаси Республика Кенгашининг эсдалик совғалари билан тақдирландилар.