Previous Next

17.02.2025. Toshkentdagi ISFT (International School of Finance Technology and Science) instituti, O‘zbekiston Davlat muassasalari va jamoat xizmati xodimlari kasaba uyushmasi Respublika kengashi hamda “O‘zbekligim — o‘zligim” NNT hamkorligida “Millatimizning buyuk mutafakkirlari zamondoshlarimiz ardog‘ida” mavzusida davra suhbati bo‘lib o‘tdi. Tadbir o‘zbek adabiyoti va tarixiga ulkan hissa qo‘shgan buyuk mutafakkirlar — Alisher Navoiy va Zahiriddin Muhammad Boburning ilmiy merosiga bag‘ishlandi.

Tadbirdan ko‘zlangan maqsad A. Navoiy va Z. M. Boburning ijodiy va ma’naviy merosini chuqur o‘rganish, ularning falsafiy qarashlari va ijtimoiy-siyosiy g‘oyalarini hozirgi davr nuqtai nazaridan tahlil qilish, shuningdek, yosh tadqiqotchilar o‘rtasida ushbu masalalar bo‘yicha fikr almashishni rag‘batlantirishdan iborat.

Davra suhbatida taniqli olimlar, adabiyotshunoslar, tarixchilar, ijtimoiy fanlar mutaxassislari, doktorantlar, magistrantlar va talabalar ishtirok etdilar.

ISFT instituti talabalari tomonidan “Bobur va bugun” sahna ko‘rinishi taqdim etildi. G‘azalxonlik, o‘zbek milliy liboslari namoyishi tashkil etildi hamda A. Navoiy va Z. M. Bobur kuniga bag‘ishlangan videoroliklar ishtirokchilar e’tiboriga havola qilindi.

Buyuk ajdodlar merosining bugungi kundagi dolzarbligi va uning yosh avlod tarbiyasidagi o‘rni haqida fikrlar bildirildi.