Previous Next

12.03.2025. Ayol va gul nafosatda, noziklikda, go‘zallikda bahslashadi. Ikkalasi bir bo‘lganida, bularning bari jamlanadi. O‘KUF Sirdaryo viloyati Kengashining muhtasham anjumanlar zaliga yig‘ilganlar buning guvohi bo‘lishdi. Xalqaro xotin-qizlar bayrami munosabati bilan ayollarga ehtirom ko‘rsatilib, gullar berildi. Tizimda uzoq yillar mehnat qilgan faxriylar, nuroniylar, ayni paytda faoliyat ko‘rsatayotgan ayollar taklif qilingan “Mehr quyoshi – ayol” deb nomlangan tadbirni viloyat Kengashi raisi Rustambek Tursunmurodov tabrik so‘zlari bilan boshladi.

Sohaga mehnati singgan fidoyi opa-singillar tilga olindi. Sirdaryoning faxri bo‘lgan yetakchi xotin-qizlar ibrat qilib ko‘rsatildi. Bu nozik xilqat vakillari mehr quyoshiga qiyos qilindi. Kengash raisi yig‘ilganlarni chin ko‘ngildan tabriklab, ularga qimmatbaho sovg‘alar taqdim etdi.

Kasaba tizimida ishchi-xodimlar, mehnatkashlar manfaatlarini o‘z manfaatlaridan ustun qo‘yganlar uzoq ishlaydilar, – dedi nuroniylar nomidan so‘z olgan kasaba faxriysi Mohira Umarova. – Shu sohada ozmi-ko‘pmi qilgan mehnatimizni qadrlab, ko‘rsatilayotgan hurmat uchun minnatdorchiligimni bildiraman. Bu sohada bugungi kunda ishlayotganlarga havasim keladi. Negaki, kasabaning nufuzi ortib bormoqda. Kasaba qo‘mitalari keksayu yoshning g‘amxo‘riga aylanib bormoqda. E’tibor, ehtirom uchun yana bir bor katta rahmat.

Tadbirda viloyat san’atkorlari tomonidan kuy-qo‘shiqlar ijro etilib, raqslarga ulanib ketdi.