Previous Next

19.03.2025. Ma’lumki, bu yil O‘zbekiston kasaba uyushmalari harakatiga 120 yil to‘lmoqda. Shu munosabat bilan mamlakatimiz bo‘ylab turli ma’naviy-ma’rifiy tadbirlar tashkil etilmoqda.

O‘zbekiston kasaba uyushmalari Federatsiyasi Farg‘ona viloyati kengashi tomonidan viloyat musiqali drama teatrida bo‘lib o‘tgan “Rahbar va yoshlar” uchrashuvida ham kasaba uyushmalarining o‘tgan davrda bosib o‘tgan faoliyati va bugungi kunda olib borilayotgan islohotlar haqida yoshlarga ma’lumotlar berildi.

Unda oliy ta’lim muassasalarida tahsil olayotgan va mehnat jamoalarida faoliyat yuritayotgan yoshlar hamda ish beruvchi vakillari ishtirok etdi.

Darhaqiqat, bugun mamlakatimizda yoshlar uchun katta imkoniyatlar eshigi ochilgan. Ayniqsa, Prezidentimiz yosh avlodga e’tibor va g‘amxo‘rlik ko‘rsatib kelmoqda. Yaratilgan sharoitlar tufayli yoshlarimiz o‘zini har sohada namoyon etmoqda.

Bugungi kunda O‘zbekiston kasaba uyushmalari Federatsiyasi Farg‘ona viloyati kengashi tarkibida 700 ming nafardan ziyod faollar birlashgan bo‘lsa, ularning 200 mingdan ortig‘ini yoshlar tashkil etadi. Kasaba uyushmalari ham yoshlarni doimiy ravishda qo‘llab-quvvatlab, ularning orzu-maqsadlarini ro‘yobga chiqarishga ko‘maklashib kelmoqda. Shuningdek, ularning maroqli dam olishlari, tarixiy qadamjolarga sayohatga borishlari, iqtidor va salohiyatlarini ro‘yobga chiqarishlari uchun ko‘maklashilmoqda.

Xususan, birgina 2024 yilda kasaba uyushmasi hamda ish beruvchi tomonidan 400 nafarga yaqin yosh ishchi-xodimlar kasaba uyushmalari tasarrufidagi sihatgohlarda mazmunli hordiq chiqarib qaytgan bo‘lsa, 2,5 mingdan ziyod yosh ishchi-xodimlar respublikamizning turli diqqatga sazovor joylariga bepul sayohatlarga yuborildi. Bundan tashqari, har yili faol talabalarga “Kasaba uyushma stipendiyasi” berib kelinmoqda.

Uchrashuvda o‘tgan 120 yil ichida kasaba uyushmalari ulkan islohotlar davrini bosib o‘tgani, 1905 yilda aloqa va temir yo‘l ishchilari to‘planib, yig‘ilishlar o‘tkazib, ish beruvchilarga o‘z talabnomalarini bayon etganliklari, keyinchalik ish vaqtini 8 soat etib belgilashni ilgari surishgani kabi bir qator ma’lumotlar berildi. Ha, aytish joizki, bundan 120 yil muqaddam ishchilar ish beruvchilarga talabnomalar qo‘ygan bo‘lsa, bugunga kelib mehnat jamoalarida jamoa shartnomalari shu vazifani bajarmoqda. Jamoa shartnomalari orqali ishchi-xodimlarning huquq va manfaatlari to‘laqonli ta’minlanmoqda.

Tadbir davomida yoshlarning bilimlarini mustahkamlash maqsadida viktorina o‘yini ham o‘tkazilib, unda savollarga tezkor va to‘g‘ri javob bergan ishtirokchilarga O‘zbekiston kasaba uyushmalari Federatsiyasi Farg‘ona viloyati kengashining esdalik sovg‘alari topshirildi.

Ko‘tarinki ruhda o‘tkazilgan uchrashuv yakunida yoshlar uchun Farg‘ona viloyat musiqali drama teatri tomonidan sahnalashtirilgan “Zo‘rdan zo‘r chiqsa” nomli komediyali spektakl’ namoyish etildi.