Previous Next

19.03.2025. Ўзбекистон кимё ва фармацевтика саноати ходимлари касаба уюшмаси ва тармоқ тизимидаги бошланғич касаба уюшмалари ташкилотлари томонидан 21 март — Наврўз умумхалқ байрами муносабати билан меҳнат жамоаларида Наврўз айёмига хос янгиланиш ва бунёдкорлик руҳини, она заминга меҳр-эътиборни, инсон ва табиат ўртасидаги уйғунликни ифода этувчи, кишиларни бугунги тинч ва фаровон ҳаётни қадрлаб, шукроналик туйғуси билан яшашга, атроф-муҳит ҳамда унинг неъматларини асраб-авайлашга, эзгу орзу-мақсадлар билан яшашга ундайдиган маънавий-маърифий тадбирлар “Анъана, урф-одат ва қадрият” мавзуси доирасида “Маърифат соатлари”, хайрия ишлари, “Яшил макон” умуммиллий лойиҳаси ва “Долзарб бир ойлик” доирасида корхоналар ҳудудида амалга оширилмоқда. Спорт мусобақалари ўтказишда эса миллий халқ ўйинларига алоҳида эътибор қаратилмоқда.

Наврўз умумхалқ байрами ва Ўзбекистон касаба уюшмаларининг 120 йиллиги муносабати билан Республика кенгаши ва “Навоийазот” АЖ касаба уюшмаси қўмитаси ҳамкорлигида корхонанинг 50 нафар ходими учун Тошкент шаҳрига саёҳат ташкил этилди. Ходимлар саёҳат давомида Тошкент шаҳрида сўнгги йилларда қад ростлаган иншоотлар билан яқиндан танишдилар ва Алишер Навоий номидаги киносаройда ўтказилган концерт дастурида маданий ҳордиқ чиқардилар. “Навоийазот” АЖнинг барча цехларида ходимлар иштирокида Наврўз сайллари, миллий спорт мусобақалари ва кўрик-танловлар ўтказилмоқда. Шодиёна муносабати билан ишлаб чиқариш цехларида тўкин дастурхонлар ёзилди, миллий ўлан ва лапарлар ижро этилиб, ўйинлар ташкил этилмоқда. Ходимлар томонидан ташкил этилган миллий қадриятларни ўзида акс эттирган кўргазмалар барчага байрам кайфиятини улашмоқда.

Тармоқ тизимидаги яна бир корхона — “Maxam-Chirchiq” АЖ касаба уюшмаси қўмитаси томонидан “Қадриятларинг боқий бўлсин, Наврўз!” шиори остида ходимлар ўртасида “Zakovat-Quiz” интеллектуал ўйини ўтказилди. Интеллектуал ўйин 24 та жамоа иштирокида 8 раунд давом этиб, қизғин курашларга бой бўлди. Якуний натижаларга кўра, ғолиб ва совриндорлар ташкилотчиларнинг эсдалик совғалари билан тақдирландилар. Шунингдек, 14–15 март кунлари жамиятнинг 36 нафар ходими учун Бухоро шаҳрига саёҳат ташкил этилди. Саёҳат давомида ходимлар Бухоро шаҳрининг гўзал ва тарихий обидалари — Мир-Араб, Кўкалдош, Нодир Девонбеги мадрасалари, Бухоро карвонсаройи, Арк қалъаси ва Ситораи Моҳи Хоса саройига ташриф буюрдилар.

Тармоқ тизимидаги “Қўнғирод сода заводи” МЧЖ ҚК касаба уюшмаси қўмитаси томонидан ҳам байрам муносабати билан қатор тадбирлар ўтказилмоқда. Жумладан, корхона ҳудуди ва Элобод шаҳарчасида ободонлаштириш ва кўкаламзорлаштириш ишлари олиб борилди. Наврўз умумхалқ байрами муносабати билан корхонада ишловчи ходимлар ўртасида миллий спорт турлари бўлган арқон тортиш, тош кўтариш ва миллий кураш бўйича мусобақалар катта тайёргарлик билан ўтказилди. Корхона томонидан Наврўз байрамининг асосий тадбири Элобод шаҳарчасида юқори даражада ташкил этилди. Тадбир давомида корхона ходимлари ўртасида ўтказилган арқон тортиш, кураш ва тош кўтариш миллий спорт ўйинлари ғолибларига касаба уюшмаси томонидан эсдалик совғалари топширилди.

Цех ва бўлимлар ходимлари миллий таомларимизни акс эттирган байрам дастурхонлари билан фаол иштирок этдилар.

Байрам тадбирида Қорақалпоқ эстрада юлдузларининг ижролари йиғилганларга юқори кайфият улашди.

Тармоқ тизимидаги бошқа корхоналарда ҳам ходимлар фаол иштирокида Наврўз умумхалқ байрами кенг нишонланмоқда.

Шавкат Таиров

Кимё ва фармацевтика саноати ходимлари касаба уюшмаси Республика кенгаши раисининг ёшлар масалалари бўйича маслаҳатчиси