Previous Next

26.05.2025. 2025 yil 17–19 may kunlari Turkiyaning Anqara shahrida Xalqaro Yevrosiyo metallurglar federatsiyasi 2-Qurultoyi va Turk-metall kasaba uyushmasining “Yoshlar Forumi” bo‘lib o‘tdi.

Ushbu tadbirlarda O‘zbekiston metallurgiya va mashinasozlik sanoati tarmoqlari xodimlari kasaba uyushmasi Respublika kengashi raisi o‘rinbosari Isroilov Shoikrom Shoumarovich, yoshlar masalalari bo‘yicha maslahatchi Roziqov Jasur Qobil o‘g‘li, tashkiliy bo‘lim boshlig‘i Komilov Ilhomjon Ibrohimovich hamda “SamAvto” MChJ yoshlar yetakchisi Mamatqulov Shukurullo Boxodir o‘g‘li ishtirok etdilar.

17 may kuni tadbir ishtirokchilari Anqara shahridagi Esenbog‘a Termal’ mehmonxonasiga joylashishdi. 18 may kuni Anqara bo‘ylab ekskursiya uyushtirildi. 19 may kuni mazkur mehmonxonada “Yoshlar Forumi” va 2-Qurultoy o‘z ishini boshladi.

Forum ochilishida Turk Ish Konfederatsiyasi raisi Ergun Atalay, Turk-metall kasaba uyushmasi raisi Uysal Altundag‘, Turkiya mehnat va ijtimoiy himoya vaziri Vedat Ishikxan hamda yirik kompaniyalar rahbarlari ishtirok etib, so‘zga chiqishdi.

Tadbirlarda Turk-metall kasaba uyushmasi a’zosi bo‘lgan 800 nafar yosh ishchi, shuningdek, Xalqaro Yevrosiyo metallurglar Federatsiyasiga a’zo 30 ga yaqin davlatdan taklif etilgan 45 nafar yosh mutaxassis ishtirok etdi.

Qurultoy doirasida mehnat va ijtimoiy himoya vaziri Vedat Ishikxan hamda turli davlatlardan tashrif buyurgan mehmonlar o‘rtasida uchrashuvlar va fikr almashinuvlar bo‘lib o‘tdi.

Shuningdek, Rossiya, Belarus’, Moldova, Bolgariya, Shimoliy Kipr, Qozog‘iston, Tojikiston, Qirg‘iziston kabi davlatlardan kelgan yosh yetakchilar bilan ham muloqotlar o‘tkazilib, kelgusida Xalqaro Yevrosiyo metall ishchilari yoshlari konferensiyasini tashkil etish taklifi ilgari surildi.

O‘zbekiston kasaba uyushmalari Federatsiyasi matbuot xizmati