Previous Next

13.11.2025. 12 ноябрь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари “Ўзбекистон касаба уюшмаларининг 120 йиллиги” эсдалик кўкрак нишони билан тақдирландилар. Диний идорада бўлиб ўтган тадбирда нишонни Тадбиркорлик, бизнес ва хизмат кўрсатиш соҳалари ходимлари касаба уюшмаси Республика кенгаши раиси Улуғбек Муҳамедов тантанали равишда топширди.

Улуғбек Муҳамедов ўз маърузасида Президент ташаббуслари билан мамлакатимизда амалга оширилаётган кенг қамровли ислоҳотлар, инсон қадрини юксалтиришга қаратилган саъй-ҳаракатлар жараёнида касаба уюшмаларининг ўрни ва масъулияти тобора ортиб бораётганини таъкидлади. Унинг айтишича, саккиз миллиондан ортиқ аъзоларни бирлаштирган Ўзбекистон касаба уюшмалари Федерацияси мамлакатда муносиб меҳнат ва ижтимоий ҳимояни таъминлаш йўлида изчил ва самарали ишлар олиб бормоқда.

Шу билан бирга, диний соҳа ходимларининг жамоатчилик билан ишлаш, маънавиятни юксалтириш ва аҳолини бирлаштиришдаги фидокорона меҳнати ҳам давлат миқёсида муносиб эътироф этилмоқда. Муфтий ҳазратлари раҳбарлигида кейинги йилларда амалга оширилган ишлар бу юксак нишон билан тақдирланишга замин бўлгани алоҳида қайд этилди.

Тадбирда Ўзбекистон мусулмонлари идораси раисининг биринчи ўринбосари Ҳомиджон домла Ишматбеков ҳам сўзга чиқиб, Муфтий ҳазратларини эсдалик нишон билан муборакбод этди. У, шунингдек, касаба уюшмалари томонидан диний соҳа ва унинг ходимларига билдирилаётган эътибор ва ишонч бу йўналишда янада масъулият, фидойилик ва ташаббускорлик билан хизмат қилишга чорлашини таъкидлади.

Эслатиб ўтамиз, “Ўзбекистон касаба уюшмаларининг 120 йиллиги” эсдалик кўкрак нишони аҳоли фаровонлигини юксалтиришга қаратилган давлат дастурлари ижросида алоҳида фаоллик кўрсатган, шунингдек, ёш авлодни Ватанга садоқат, миллий ва умуминсоний қадриятларга ҳурмат руҳида тарбиялашда юқори натижаларга эришган фидойи инсонларга тақдим этилади.