Previous Next

06.07.2026. Бугунги кунда Ўзбекистон касаба уюшмалари Федерацияси тизимида 30 дан ортиқ санаторий фаолият юритмоқда. Ана шундай соғломлаштириш масканлари сафини йил сайин замонавийлаштирилган ва янгидан барпо этилаётган сиҳатгоҳлар тўлдириб бормоқда.

Шулардан бири — Навоий вилоятининг Хатирчи туманида жойлашган «Олтинсой» санаторийсидир. Мазкур сиҳатгоҳнинг Ўзбекистон касаба уюшмалари Федерацияси томонидан тўлиқ реконструкция қилиниб, фойдаланишга топширилгани мамлакатимиз Мустақиллигининг 35 йиллиги арафасида халқимиз учун муносиб байрам туҳфаси бўлди.

85 ўринга мўлжалланган икки қаватли бинода маъмурият, қабулхона, даволаш бўлими, туз ғори, жисмоний тарбия зали, физиотерапия, дазмоллаш ва қуритиш хоналари янгидан ташкил этилди.

Шунингдек, замонавий холл ва ресепшен, УЗИ, кардиология ва ЭКГ, турли муолажа хоналари, озонотерапия, терапевт, лазеротерапия, ингаляция ҳамда дарсонвал хоналари капитал таъмирланиб, энг сўнгги русумдаги замонавий тиббий асбоб-ускуналар билан жиҳозланди.

Санаторийнинг тантанали очилиш маросимида Ўзбекистон касаба уюшмалари Федерацияси ва унинг Навоий вилоят Кенгаши, вилоят ҳокимлиги, «Нуроний» жамғармаси вилоят бўлими, вилоят Ёшлар ишлари бошқармаси мутасаддилари, меҳнат фахрийлари, нуронийлар, касаба уюшмалари фаоллари ҳамда кенг жамоатчилик вакиллари иштирок этдилар.

Янгиланган «Олтинсой» санаторийси аҳолига сифатли тиббий хизмат кўрсатиш, дам олиш ва соғломлаштириш имкониятларини янада кенгайтиришга хизмат қилади.