22.08.2015. 2015 йилнинг 21-22 август кунлари Ўзбекистон касаба уюшмалари Федерацияси ташаббуси билан республикамиздаги вазирликлар, идоралар ва жамоат ташкилотларида фаолият кўрсатаётган ходимлар ўртасида Касаба уюшмалари Федерацияси кубоги учун мини футбол мусобақаси ўтказилди.

Ватанимиз Мустақиллигининг 24 йиллигига бағишланган мазкур мусобақаларда 13 та вазирлик ҳамда идоралар, 7 та йирик жамоат ташкилотлари ходимларидан иборат 20 та жамоа ўзаро куч синашди.

Мазкур мусобақаларни ўтказишдан асосий мақсад – ходимлар ўртасида спортнинг оммавийлигини ошириш, меҳнат жамоаларида соғлом турмуш тарзи барқарорлигини таъминлаш, бу орқали ходимлар ва уларнинг оила аъзолари саломатлигини мустаҳкамлашдир. Шунингдек, турли соҳа ходимлари ўртасида ўзаро дўстлик алоқаларини янада мустаҳкамлаш, уларнинг мазкур спорт турига бўлган қизиқишларини ошириш ҳамда спортнинг мини-футбол турини оммалаштириш масалалари ҳам ташкилотчиларнинг диққат марказида бўлди.

Таъкидлаш зарурки, бугунги кунда мамлакат касаба уюшмалари меҳнаткашларнинг ижтимоий-иқтисодий манфаатлари ва меҳнат соҳасидаги ҳуқуқларини ҳимоялаш билан бирга меҳнат жамоаларида ходимлар гимнастикасини ривожлантириш, уларни жисмоний тарбия ва спортга кенг жалб этиш борасида ҳам тизимли ишларни амалга оширмоқда. Бу ўз навбатида ишчи-хизматчиларни турли касб касалликларидан муҳофаза қилиш, фойдали иш коэффициенти ҳамда ишлаб чиқариш унумдорлигини ошириш имконини бермоқда. Хусусан, меҳнат жамоаларида махсус тавсиялар асосида ташкил этилаётган ходимлар гимнастикасининг мунтазам йўлга қўйилгани натижасида бугунги кунда республика миқёсида 30473 та корхона, ташкилот ва муассасада 3 миллиондан ортиқ меҳнаткаш ишлаб чиқаришдан ажралмаган ҳолда жисмоний тарбия ва спорт билан шуғулланиб келмоқда. Шунингдек, Ўзбекистон касаба уюшмалари Федерацияси томонидан республикамизнинг барча ҳудудларида турли тармоы меҳнаткашлари ўртасида тизимли равишда спорт мусобақалари, тармоқлараро спартакиадалар, оилавий эстафеталар ташкил этилмоқда. Анъанавий равишда ўтказиб келинаётган “Соғлом оила”, “Биз спортчилар оиласи” каби оилавий спорт мусобақалари,  “Соғлом турмуш сари” шиори остидаги спартакиадалар, “Саломатлик акцияси” тарзидаги “Касаба – TUR” ходимлар веломарафони шулар жумласидандир. Ушбу спорт мусобақаларида ҳар йили 4 миллионга яқин турли соҳа ходимлари иштирок этмоқдалар. Бундан ташқари, бошланғич касаба уюшма ташкилотлари томонидан жамоа шартномалари ва келишувлари орқали ишчи-ходимлар ҳамда улар оила аъзоларининг турли спорт секцияларида имтиёзли шуғулланишлари таъминланмоқда.

Касаба уюшмалари Федерацияси кубоги учун ўтказилган мини футбол мусобақаларида барча иштирокчилар соғлом рақобат муҳитида спортнинг мазкур тури бўйича ўз маҳоратларини кўрсатибгина қолмай, касб йўналишлари бўйича тажриба алмашиш имконига ҳам эга бўлдилар.

Мусобақалар давомида таниқли спортчилар, санъаткорлар, ёш ижрочилар ва бадиий ҳаваскорлик дасталари, маданият ходимлари иштирокида соғлом турмуш тарзини тарғиб этишга қаратилган маданий тадбирлар ҳам ўтказилди. Нуфузли ҳакамлар ҳайъати томонидан ғолиблар аниқлангунига қадар спорт байрами иштирокчилари эътиборига таниқли санъаткорлар ва ёш ижрочилар, бадиий жамоаларнинг чиқишлари намойиш этилди.

Мусобақа натижасига кўра, 1-ўринни Ўзбекистон Республикаси Ички Ишлар вазирлиги жамоаси, 2-ўринни Ўзбекистон Республикаси Президенти Девони жамоаси,  3-ўринни Ўзбекистон Республикаси Адлия вазирлиги жамоаси эгаллади. Ғолиб жамоалар Касаба уюшмалари Федерацияси Кенгаши томонидан таъсис этилган махсус диплом ва қимматбаҳо совғалар билан тақдирландилар.

Мусобақада шунингдек, қўшимча номинациялар бўйича ҳам ғолиблар аниқланди. Хусусан, “Ғалабага бўлган интилиши юксак жамоа”,“Энг маҳоратли ҳужумчи”,“Энг яхши техник маҳорати учун”, “Энг ёши улуғ иштирокчи”, “Энг ёш иштирокчи”, ,“Энг яхши дарвозабон”, “Ҳалол ўйин (FairPlay) учун” номинациялари бўйича ғолиб деб топилган жамоаларга касаба уюшмаларининг рағбатлантирувчи мукофотлари топширилди.

Ўзбекистон касаба уюшмалари Федерацияси Кенгаши Матбуот хизмати