Previous Next

21.02.2025. Hisobot-saylov yig‘ilishlari va konferensiyalari boshlang‘ich kasaba uyushmasi tashkiloti faoliyatida muhim voqelikdir.2025 yil kasaba uyushmalari tizimida hisobot-saylovlar yili ekanligi bois mazkur jarayonda o‘tgan besh yillikdagi faoliyat sarhisob qilinib, erishilgan natijalar tahlil etilmoqda.

“O‘zbekiston pochtasi” Aksiyadorlik jamiyatining “Toshkent pochtamti” filiali boshlang‘ich kasaba uyushma tashkiloti hisobot-saylov konferensiyasida ham o‘tgan hisobot davrida kasaba uyushma tashkiloti tomonidan mehnatkashlar manfaatlari yo‘lida amalga oshirilgan ishlar, erishilgan natijalar, shu bilan bir qatorda, faoliyatni tashkil etishda qanday kamchiliklarga yo‘l qo‘yilgani chuqur tahlil qilinib, kelgusidagi ustuvor vazifalar belgilab olindi.

Dastavval filial jamoa shartnomasining 2024 yildagi ijrosi yuzasidan ish beruvchi vakili hisobot berdi. Shundan so‘ng kasaba uyushma qo‘mitasi raisi “O‘zbekiston pochtasi” AJ “Toshkent pochtamti” filiali kasaba uyushma qo‘mitasining 2020-yil fevraldan 2025-yil fevralgacha bo‘lgan davr mobaynidagi faoliyati to‘g‘risida konferensiya ishtirokchilari bo‘lgan xodimlarga batafsil ma’lumot berdi. Kasaba uyushma tashkiloti taftish komissiyasining hisoboti tinglandi.

Ta’kidlanganidek, filial boshlang‘ich kasaba uyushma tashkiloti tomonidan o‘tgan hisobot davrida Filial, bog‘lama va aloqa bo‘limlari xodimlarining ijtimoiy-iqtisodiy manfaatlarini himoya qilish, ularning to‘liq bandligini ta’minlanishi hamda sog‘lom va qulay mehnat sharoitlari yaratib berilishiga erishish, mehnat qonunchiligiga rioya etilishi ustidan jamoatchilik nazoratini amalga oshirish, xodimlarni sog‘lomlashtirish, xodimlar o‘rtasida madaniy-ma’rifiy, sport va intellektual tadbirlarni tashkil etish sohasida muayyan ishlar amalga oshirildi. Xususan, 2020 yilda jamoa shartnomasi orqali har bir xodimga sarflangan mablag‘ miqdori o‘rtacha 1 million 399 ming so‘mni tashkil etgan bo‘lsa, 2024 yilda bu ko‘rsatkich 4 million 471 ming so‘mga yetdi. 2020 yil davomida xodimlarga berilgan moddiy yordam miqdori  532 million so‘mni tashkil etgan bo‘lsa, 2024 yil  yakuniga ko‘ra xodimlarga berilgan moddiy yordam miqdori 1 mlrd. 598 million so‘mga yetdi.

Bundan tashqari hisobot davrida filialning 29 ta bo‘limi, Pochta aloqa bog‘lamalari va 115 ta aloqa bo‘limlari 22 mln. so‘mlik dori- darmonlar bilan ta’minlandi. Xodimlarni sug‘urtalash uchun 91 mln. so‘mdan ortiq mablag‘ ajratildi. Xodimlarni maxsus kiyim-bosh bilan ta’minlash maqsadida 692 mln. 421 ming so‘m yo‘naltirildi. Filial  xodimlari  ko‘p tarmoqli tibbiy ko‘rikdan bepul o‘tkazildi.

Ishdan tashqari yozgi dam olish kunlarini maroqli va mazmunli o‘tkazish maqsadida Toshkent viloyatining Bo‘stonliq tumanida joylashgan «Nilufar» dam olish maskanida  mehnatkashlar hordig‘i tashkil etildi. Xodimlar salomatligini mustahkamlash maqsadida kasaba uyushmalari tizimidagi “Oqtosh”, “Zomin”, “Chinobod”, “Kosonsoy”, “Turon”, “Botanika”, “Bo‘ston”, “Xumson” va “Chimyon” sihatgohlariga imtiyozli yo‘llanmalar bilan ta’minlandilar.

Shuningdek, «O‘zbekiston bo‘ylab sayohat qil!» va «Men yurtimni sevaman!» shiorlari ostida qadimiy va navqiron Samarqandga, Islom madaniyati poytaxti bo‘lgan Buxoroga, ochiq osmon ostidagi –  muzey Xivaga, xushmanzara tog‘li hududlarga xodimlarning sayyohatlari tashkil etildi.  Xodimlarning 7-14 yoshgacha bo‘lgan farzandlari yozgi ta’tilda “Konstruktor” va “Aloqachi” oromgohlarida sog‘lomlashtirildi. Mehnatkashlar va ular farzandlari uchun turli ko‘rik-tanlovlar, sport musobaqalari, istirohat bog‘lariga, teatr va konsertlarga tashriflar uyushtirildi.  Pochta soxasida uzoq yillar samarali mehnat qilib, pensiyaga chiqqan nuroniylar xolidan xabar olinib, sovg‘a-salomar, oziq-ovqat mahsulotlari topshirildi.

Hisobot-saylov konferensiyasida ko‘rilgan masalalar yuzasidan muzokaralarda so‘zga chiqqan delegatlar tomonidan “O‘zbekiston pochtasi”  AJ “Toshkent pochtamti” filiali kasaba uyushmasi qo‘mitasining hisobot davridagi faoliyati qoniqarli deb topilib, taftish komissiyasi hisoboti tasdiqlandi.

Shundan so‘ng konferensiya kun tartibiga muvofiq kasaba uyushma qo‘mitasi raisi saylab olindi. Ma’lumki, “O‘zbekiston kasaba uyushmalari Federatsiyasi tizimidagi kasaba uyushmalari tashkilotlarida hisobot-saylovlarni o‘tkazish to‘g‘risida Nizom”ga muvofiq boshlang‘ich tashkilotlar saylanma organlarining ishlab chiqarishdagi ishidan ozod etilgan raisi saylovi muqarrar ravishda muqobillik asosida, yashirin ovoz berish yo‘li bilan o‘tkazilishi belgilangan. Shunga ko‘ra delegatlar tomonidan kasaba uyushma qo‘mitasi raisligiga muqobillik asosida 2 kishining nomzodi ilgari surildi. Yashirin ovoz berish natijalariga ko‘ra filialning amaldagi kasaba uyushma qo‘mitasi raisi Nazokat Karimova ko‘pchilik ovoz bilan “O‘zbekiston pochtasi”  AJ “Toshkent pochtamti” filiali kasaba uyushmasi qo‘mitasi raisi etib saylandi. Shuningdek, boshlang‘ich kasaba uyushma qo‘mitasining 5 kishidan iborat tarkibi, taftish komissiyasi tarkibi va raisi saylandi. Qo‘mitaga saylangan har bir a’zoga dublyor tanlandi.

Hisobot-saylov konferensiyasi davomida O‘zbekiston axborot texnologiyalari va ommaviy kommunikasiya xodimlari kasaba uyushmasi Qurultoyiga hamda O‘zbekiston  kasaba uyushmalari Federatsiyasining Toshkent shahar kengashi Konferensiyasiga delegatlar saylab olindi.

Konferensiya yakunida “O‘zbekiston pochtasi”  AJ “Toshkent pochtamti” filiali direktori Shuxrat Atamuhamedov so‘zga chiqib, kasaba uyushma qo‘mitasi bilan hamkorlikda kelgusida ham mehnat jamoasi manfaatlarini himochlash bilan birga “O‘zbekiston-2030” strategiyasini amalga oshirish jarayonida faol ishtirok etishlarini alohida ta’kidladi. Xodimlarning ijtimoiy-iqtisodiy huquq va manfaatlarini himoyalash borasida kelgusidagi ustuvor vazifalar belgilab olindi.

Muhabbat O‘rmonbekova

O‘zbekiston kasaba uyushmalari Federatsiyasi Matbuot xizmati rahbari