Previous Next

15.03.2025. O‘zbekiston kasaba uyushmalari Federatsiyasida Tailand Qirolligining Bangkok shahrida bo‘lib o‘tgan xokkey bo‘yicha U-18 Jahon chempionatida ishtirok etib, g‘oliblikni qo‘lga kiritgan O‘zbekiston kasaba uyushmalari Federatsiyasi xokkey jamoasining murabbiy va sportchilari bilan uchrashuv bo‘lib o‘tdi.

O‘zbekiston kasaba uyushmalari Federatsiyasi raisi Qudratilla Rafikov tadbirni O‘zbekiston Respublikasi Prezidenti Shavkat Mirziyoevning Fransiya Respublikasiga davlat tashrifi doirasida yuz bergan tarixiy xushxabar bilan boshladi. Xususan, Federatsiya raisi mazkur tashrif doirasida Parij shahrida  O‘zbekiston Respublikasi Prezidenti Shavkat Mirziyoev Fransiya Prezidenti Emmanuel’ Makron tomonidan tantanali ravishda Fransiya Respublikasining oliy mukofoti – Faxriy legion ordeni bilan taqdirlanganini yuksak faxr va ehtirom bilan alohida ta’kidladi hamda mamlakatimizdagi 7 milliondan ortiq kasaba uyushma a’zolari va faollari bunday quvonchli xabarni chuqur hurmat va zo‘r mamnuniyat bilan qarshi olganlarini bildirdi.

– Davlatimiz rahbarining ikki mamlakat hamkorligini rivojlantirish, xalqlarimiz o‘rtasidagi do‘stlik va o‘zaro anglashuvni mustahkamlashga qo‘shgan ulkan hissasi uchun ushbu yuksak mukofotga sazovor bo‘lgani butun O‘zbekiston xalqini, shu jumladan, barcha kasaba uyushma a’zolari va faollarini birdek quvontirdi, – dedi jumladan, O‘zbekiston kasaba uyushmalari Federatsiyasi raisi Qudratilla Rafikov. – Dunyo miqyosida sanoqli shaxslargina sazovor bo‘lgan mazkur ordenning O‘zbekiston Respublikasi Prezidentiga topshirilishi – Davlatimiz rahbari tomonidan olib borilayotgan odilona va oqilona siyosatning, shuningdek, Yangi O‘zbekistonda barcha sohalarda birdek amalga oshirilayotgan tub islohotlar samarasining dunyo hamjamiyatidagi navbatdagi e’tirofi bo‘ldi. 7 millionlik kasaba uyushma a’zolari va faollari nomidan muhtaram Prezidentimizni bunday yuksak e’tirof va natija bilan samimiy qutlaymiz.

Shundan so‘ng uchrashuvda Yangi O‘zbekistondagi xokkey ishqibozlarining ko‘p yillik orzularini ro‘yobga chiqargan g‘alaba – yosh xokkeychilarimizning Tailand Qirolligining Bangkok shahrida bo‘lib o‘tgan xokkey bo‘yicha U-18 Jahon chempionatida chempionlik unvonini qo‘lga kiritgani alohida qayd etildi.

Ta’kidlash zarurki, o‘zbek xokkey sporti tarixidagi mazkur olamshumul yutuqlarga erishishda O‘zbekiston kasaba uyushmalari Federatsiyasining “Muz ustida xokkey bo‘yicha ixtisoslashtirilgan bolalar va o‘smirlar sport maktabi” o‘quvchilaridan tashkil topgan O‘zbekiston yosh xokkeychilar jamoasi Janubiy Afrika, Lyuksenburg, Turkmaniston, Bosniya-Gersegovina, Tayland kabi davlatlarning kuchli xokkey jamoalarini yengib, chempionlikni ko‘lga kiritdilar va o‘zbek xokkey sporti tarixida yangi sahifa ochib berdilar.

O‘zbekiston jamoasining jahon chempionatidagi o‘yinlari yosh xokkeychilarimizning yuqori professional mahoratga va barcha raqiblaridan bir-necha pog‘ona ustunlikka ega ekanliklarini namoyish etdi. Xususan, O‘zbekiston yosh xokkeychilar jamoasi Janubiy Afrika jamoasini – 12:0, Lyuksemburg  jamoasini  – 12:1, Turkmaniston jamoasini – 8:2, Bosniya – Gersegovina jamoasini – 11:3, mezbon bo‘lgan Tayland jamoasini esa 3:2 xisobda mag‘bul etib, mutloq g‘oliblikni ko‘lga kiritdi.

Shuningdek, chempionatning 14 ta goli (shaybasi) va 8 ta uzatishi natijasiga ko‘ra Jasurbek Rustamxonov “Eng yaxshi hujumchi” va “Eng yaxshi o‘yinchi” nominasiyasini, Rustam Irgashev esa “Eng yaxshi darbozabon” nominasiyasini qo‘lga kiritdi.

Uchrashuvda qayd etilganidek, O‘zbekiston yoshlarining jahon arenalarida erishayotgan mana shunday tarixiy yutuqlari va muvaffaqiyatlari Muhtaram Prezidentimiz tashabbuslari bilan Yangi O‘zbekistonda jismoniy tarbiya va sportni rivojlantirish, professional sportchilarni tanlash va tayyorlash bo‘yicha olib borilayotgan keng ko‘lamli islohotlarning amaliy samarasidir.

Jahon chempionati – yosh xokkeychilarimiz uchun chinakam iroda, jasorat va matonat maktabi bo‘ldi. Shijoatli yoshlarimiz g‘oyat keskin bellashuvlarda yuksak marralarni egallab, Jahon chempionati musobaqalarining haqiqiy qahramonlariga aylandi.

Shundan so‘ng yuksak g‘alabani qo‘lga kiritgan O‘zbekiston kasaba uyushmalari Federatsiyasining xokkey jamoasi yosh sportchilari va ularning murabbiylari Kasaba uyushmalari Federatsiyasi tomonidan munosib rag‘batlantirildi va ularga tabriknoma hamda pul mukofotlari topshirildi.

O‘z navbatida O‘zbekistonning yosh hokkeychilari Prezidentimiz tashabbuslari bilan sportning mazkur turini rivojlantirish maqsadida amalga oshirilayotgan sa’y-harakatlar va yaratilayotgan imkoniyatlar uchun minnatdorchilik bildirib, kelgusida Davlatimiz bayrog‘ini bundan-da yuksaklarga ko‘rtarishga, Madhiyamizning dunyo arenalarida yangrashiga, yurtimiz nufuzini yanada yuksak bosqichlarga olib chiqishda munosib hissa qo‘shishga va’da berdilar.

Muhabbat O‘rmonbekova

O‘zbekiston kasaba uyushmalari Federatsiyasi Matbuot xizmati rahbari