Previous Next

19.03.2025. O‘zbekiston kimyo va farmatsevtika sanoati xodimlari kasaba uyushmasi va tarmoq tizimidagi boshlang‘ich kasaba uyushmalari tashkilotlari tomonidan 21 mart — Navro‘z umumxalq bayrami munosabati bilan mehnat jamoalarida Navro‘z ayyomiga xos yangilanish va bunyodkorlik ruhini, ona zaminga mehr-e’tiborni, inson va tabiat o‘rtasidagi uyg‘unlikni ifoda etuvchi, kishilarni bugungi tinch va farovon hayotni qadrlab, shukronalik tuyg‘usi bilan yashashga, atrof-muhit hamda uning ne’matlarini asrab-avaylashga, ezgu orzu-maqsadlar bilan yashashga undaydigan ma’naviy-ma’rifiy tadbirlar “An’ana, urf-odat va qadriyat” mavzusi doirasida “Ma’rifat soatlari”, xayriya ishlari, “Yashil makon” umummilliy loyihasi va “Dolzarb bir oylik” doirasida korxonalar hududida amalga oshirilmoqda. Sport musobaqalari o‘tkazishda esa milliy xalq o‘yinlariga alohida e’tibor qaratilmoqda.

Navro‘z umumxalq bayrami va O‘zbekiston kasaba uyushmalarining 120 yilligi munosabati bilan Respublika kengashi va “Navoiyazot” AJ kasaba uyushmasi qo‘mitasi hamkorligida korxonaning 50 nafar xodimi uchun Toshkent shahriga sayohat tashkil etildi. Xodimlar sayohat davomida Toshkent shahrida so‘nggi yillarda qad rostlagan inshootlar bilan yaqindan tanishdilar va Alisher Navoiy nomidagi kinosaroyda o‘tkazilgan konsert dasturida madaniy hordiq chiqardilar. “Navoiyazot” AJning barcha sexlarida xodimlar ishtirokida Navro‘z sayllari, milliy sport musobaqalari va ko‘rik-tanlovlar o‘tkazilmoqda. Shodiyona munosabati bilan ishlab chiqarish sexlarida to‘kin dasturxonlar yozildi, milliy o‘lan va laparlar ijro etilib, o‘yinlar tashkil etilmoqda. Xodimlar tomonidan tashkil etilgan milliy qadriyatlarni o‘zida aks ettirgan ko‘rgazmalar barchaga bayram kayfiyatini ulashmoqda.

Tarmoq tizimidagi yana bir korxona — “Maxam-Chirchiq” AJ kasaba uyushmasi qo‘mitasi tomonidan “Qadriyatlaring boqiy bo‘lsin, Navro‘z!” shiori ostida xodimlar o‘rtasida “Zakovat-Quiz” intellektual o‘yini o‘tkazildi. Intellektual o‘yin 24 ta jamoa ishtirokida 8 raund davom etib, qizg‘in kurashlarga boy bo‘ldi. Yakuniy natijalarga ko‘ra, g‘olib va sovrindorlar tashkilotchilarning esdalik sovg‘alari bilan taqdirlandilar. Shuningdek, 14–15 mart kunlari jamiyatning 36 nafar xodimi uchun Buxoro shahriga sayohat tashkil etildi. Sayohat davomida xodimlar Buxoro shahrining go‘zal va tarixiy obidalari — Mir-Arab, Ko‘kaldosh, Nodir Devonbegi madrasalari, Buxoro karvonsaroyi, Ark qal’asi va Sitorai Mohi Xosa saroyiga tashrif buyurdilar.

Tarmoq tizimidagi “Qo‘ng‘irod soda zavodi” MCHJ QK kasaba uyushmasi qo‘mitasi tomonidan ham bayram munosabati bilan qator tadbirlar o‘tkazilmoqda. Jumladan, korxona hududi va Elobod shaharchasida obodonlashtirish va ko‘kalamzorlashtirish ishlari olib borildi. Navro‘z umumxalq bayrami munosabati bilan korxonada ishlovchi xodimlar o‘rtasida milliy sport turlari bo‘lgan arqon tortish, tosh ko‘tarish va milliy kurash bo‘yicha musobaqalar katta tayyorgarlik bilan o‘tkazildi. Korxona tomonidan Navro‘z bayramining asosiy tadbiri Elobod shaharchasida yuqori darajada tashkil etildi. Tadbir davomida korxona xodimlari o‘rtasida o‘tkazilgan arqon tortish, kurash va tosh ko‘tarish milliy sport o‘yinlari g‘oliblariga kasaba uyushmasi tomonidan esdalik sovg‘alari topshirildi.

Sex va bo‘limlar xodimlari milliy taomlarimizni aks ettirgan bayram dasturxonlari bilan faol ishtirok etdilar.

Bayram tadbirida Qoraqalpoq estrada yulduzlarining ijrolari yig‘ilganlarga yuqori kayfiyat ulashdi.

Tarmoq tizimidagi boshqa korxonalarda ham xodimlar faol ishtirokida Navro‘z umumxalq bayrami keng nishonlanmoqda.

Shavkat Tairov

Kimyo va farmatsevtika sanoati xodimlari kasaba uyushmasi Respublika kengashi raisining yoshlar masalalari bo‘yicha maslahatchisi