Previous Next

19.03.2025. 2025 yil 18 mart kuni Toshkent shahrining Yunusobod tumanida joylashgan 30-sonli davlat maktabgacha ta’lim tashkilotida muhim tadbir bo‘lib o‘tdi. Unda jamoa shartnomasining 2024 yilda bajarilishi tahlil qilinib, 2020-2025 yillar uchun besh yillik hisobot-saylov yig‘ilishi o‘tkazildi. Yig‘ilishda mazkur tashkilotning rahbariyati, tarbiyachilar, texnik xodimlar hamda kasaba uyushmasi a’zolari faol ishtirok etdi.

Yig‘ilishda so‘zga chiqqan Boshlang‘ich kasaba uyushmasi qo‘mitasi raisi N. Sobirova so‘nggi besh yil davomida amalga oshirilgan ishlar yuzasidan atroflicha hisobot berdi. U o‘z ma’ruzasida xodimlarning mehnat sharoitlarini yaxshilash, ularning ijtimoiy himoyasini kuchaytirish, madaniy-ma’rifiy tadbirlarni tashkil etish hamda xodimlarning huquq va manfaatlarini himoya qilish borasida amalga oshirilgan ishlar haqida so‘zladi.

Shuningdek, moliyaviy yordamlar, moddiy rag‘batlantirish, tibbiy sug‘urta va boshqa qo‘shimcha ijtimoiy kafolatlar bo‘yicha qilingan ishlar tahlil qilindi. Yig‘ilish doirasida 2025-2030 yillarga mo‘ljallangan Boshlang‘ich kasaba uyushmasi qo‘mitasi raisi saylov jarayoni ham o‘tkazildi. Saylov ochiq ovoz berish yo‘li bilan amalga oshirildi va unda kasaba uyushmasi a’zolari bir ovozdan yana N. Sobirovani mazkur lavozimga qayta saylashdi. Bu esa uning jamoa oldidagi nufuzi va mehnatkashlar orasidagi ishonchining yuqoriligini namoyish etdi.

Yig‘ilishda O‘zbekiston ta’lim va fan xodimlari kasaba uyushmasi Respublika kengashi buxgalteri X. Nuriddinov ham ishtirok etib, so‘zga chiqdi. U mamlakatimizda kasaba uyushmalari faoliyatini takomillashtirish, xodimlarning ijtimoiy himoyasini kuchaytirish borasida amalga oshirilayotgan ishlar haqida fikr bildirdi. Shuningdek, u kasaba uyushmasi a’zolarini jipslashgan holda faoliyat yuritishga, mehnatkashlarning huquq va manfaatlarini himoya qilishda yanada samarali ish olib borishga chorladi.

Yig‘ilish qatnashchilari tomonidan bildirilgan taklif va mulohazalar tinglanib, kelgusi yillar uchun rejalar belgilab olindi. Tadbir samimiy ruhda va konstruktiv muhokamalar bilan yakunlandi.