Previous Next

27.03.2025. 2025 yil 25 mart kuni Islom Karimov nomidagi Toshkent davlat texnika universiteti ma’muriyati va kasaba uyushma qo‘mitasi o‘rtasida 2023–2025 yillar uchun tuzilgan Jamoa shartnomasining 2024 yildagi ijrosi muhokama qilindi.

Yig‘ilishda O‘zbekiston ta’lim va fan xodimlari kasaba uyushmasi Toshkent shahar kengashi raisi Abduxalil Raxmonov ishtirok etdi. Dastlab, birinchi yig‘ilishda jamoa shartnomasi bandlarining bajarilishi muhokama etildi. Unda universitet rektori, akademik Sadriddin Turobjonov va kasaba uyushmasi raisi Xayrulla Zikrillaev hisobotlari tinglandi. Hisobotlardan so‘ng muhokamalar olib borilib, tegishli qarorlar qabul qilindi.

Shundan so‘ng, 47 nafar delegatlar va taklif etilgan mehmonlar ishtirokida ikkinchi yig‘ilish — universitet kasaba uyushma tashkilotining hisobot-saylov konferensiyasi bo‘lib o‘tdi. Konferensiya kun tartibida 8 ta masala bosqichma-bosqich muhokama etilib, hisobotlar yuzasidan ishtirokchilar ma’ruzalari tinglandi.

Kasaba uyushma qo‘mitasi raisiga saylov muqobillik asosida va yashirin ovoz berish yo‘li bilan o‘tkazildi. Ovoz berish natijalari va sanoq komissiyasining bayonnomasiga ko‘ra, konferensiyada ishtirok etgan 47 nafar delegatdan 38 nafari Xayrulla Fatxullaevich Zikrillaev nomzodini qo‘llab-quvvatladi. U universitet kasaba uyushma qo‘mitasi raisi, qo‘mita va rayosat a’zosi etib saylandi.