Previous Next

01.04.2025. Joriy yilning 24 mart kuni O‘zbekiston kasaba uyushmalari Federatsiyasining Sirdaryo viloyati kengashi majlislar zalida Sirdaryo viloyat bolalar ko‘p tarmoqli tibbiyot markazining 2023-2025 yillar uchun tuzilgan jamoa shartnomasi majburiyatlarining 2024 yildagi ijrosi yuzasidan mehnat jamoasining konferensiyasi bo‘lib o‘tdi.

Konferensiyada muassasa bosh shifokor o‘rinbosari S. Yarmatov, kasaba uyushmasi qo‘mitasi raisi N. Olimjonova, 6 nafar ijtimoiy-mehnat masalalari bo‘yicha komissiya a’zolari, 31 nafar delegat, 19 nafar mehnat jamoasi vakillari, O‘zbekiston Sog‘liqni saqlash xodimlari kasaba uyushmasi Respublika kengashining ijtimoiy himoya masalalari bo‘yicha bosh mutaxassisi D. Ro‘zieva, mehnat texnika va huquq inspektorlari A. G‘aniev, A. Albekov hamda tarmoq kasaba uyushmasining hududiy kengashi buxgalteri M. Axmedov ishtirok etdilar.

Konferensiyada bosh shifokor o‘rinbosari hamda kasaba uyushmasi qo‘mitasi raisining hisobotlari ma’lumot uchun qabul qilindi, ijtimoiy-mehnat masalalari bo‘yicha komissiya raisi B. Ismatovning dalolatnomasi tasdiqlandi.

Ma’lumot uchun, 2024 yil davomida jamoa shartnomasi bandlarining bajarilishi uchun o‘rta hisobda bir xodimga sarflangan mablag‘ 10 mln 667 ming so‘mni tashkil etib, o‘tgan yildagiga nisbatan 15% ga o‘sgan. Jumladan, mehnat muhofazasi bo‘yicha o‘rtacha 1 mln 600 ming so‘m sarflangan. Huquqi tiklangan 1 nafar xodimning smena asosidagi mehnat faoliyati ish stavkasiga asosan amalga oshirilishiga erishilgan. Kasaba uyushmasi aralashuvi bilan 55 ta ish o‘rni attestasiyadan o‘tkazilgan va 55 ta ish o‘rnidagi 180 nafar xodimning huquqlari tiklangan.

Konferensiyada jamoa shartnomasining ijrosi qizg‘in muhokama qilindi va faoliyati qoniqarli deb topildi.

Shundan so‘ng, muassasa kasaba uyushma tashkilotining hisobot-saylov konferensiyasi o‘tkazildi. Kun tartibidagi masalalar muhokama etildi, hisobotlar tinglandi. Sirdaryo viloyat bolalar ko‘p tarmoqli tibbiyot markazi kasaba uyushma tashkilotining o‘tgan besh yillik hisobot davridagi faoliyatiga bir ovozdan qoniqarli baho berildi. Muqobillik asosida o‘tgan saylovda amaldagi kasaba uyushmasi qo‘mitasining raisi N. Olimjonova yangi muddatga qayta saylandi.

Yig‘ilishda “O‘zbekistonda kasaba uyushmalari harakatining 120 yilligi” keng nishonlanishi yuzasidan respublikamizda olib borilayotgan keng ko‘lamli tadbirlar to‘g‘risida batafsil ma’lumot berildi.