Previous Next

02.04.2025. Respublika shoshilinch tibbiy yordam ilmiy markazi Farg‘ona filiali boshlang‘ich kasaba uyushma tashkilotining hisobot-saylov konferensiyasi bo‘lib o‘tdi.

Dastavval, Respublika shoshilinch tibbiy yordam ilmiy markazi Farg‘ona filiali kasaba uyushma qo‘mitasi raisi Bahromjon Ibaydullaev kasaba uyushma tomonidan o‘tgan besh yil davomida amalga oshirilgan ishlar, a’zolarga qanday ko‘mak ko‘rsatilgani, ularni qo‘llab-quvvatlash yo‘lida olib borilgan ishlar bo‘yicha ma’lumot berdi.

Ta’kidlanganidek, ishchi-xodimlarning mehnat muhofazasi, ijtimoiy himoyasi va salomatligini mustahkamlash ma’muriyat va kasaba uyushma qo‘mitasining e’tiborida bo‘lib keldi. Qolaversa, ishchi-xodimlarni qo‘llab-quvvatlash, moddiy va ma’naviy ko‘mak ko‘rsatish jamoa shartnomasida o‘z aksini topgan bo‘lib, undagi bandlarning ijrosiga jiddiy e’tibor qaratildi.

Xususan, xodimlar imtiyozli yo‘llanmalar orqali turli sihatgohlarda salomatligini mustahkamladi. Bir so‘z bilan aytganda, kasaba uyushma tomonidan a’zolarni har tomonlama qo‘llab-quvvatlash ishlariga katta e’tibor qaratildi.

O‘tgan davr mobaynida kam ta’minlangan, ehtiyojmand, boquvchisini yo‘qotgan 707 nafar xodimga moddiy yordam ko‘rsatildi. Yaqin qarindoshlari vafot etgan 45 nafar xodimga oziq-ovqat mahsulotlaridan iborat ko‘mak berildi. Ehtiyojmand oila vakillarining 536 nafar farzandiga yangi o‘quv yili boshlanishi arafasida maktab o‘quv-qurollari sovg‘a qilindi. 260 nafar xodimlar va ularning yaqin qarindoshlari turli sihatgohlarda dam olib, salomatligini mustahkamladilar. Ishchi-xodimlarning 187 nafar farzandlari yozgi sog‘lomlashtirish oromgohlarida hordiq chiqarish imkoniga ega bo‘ldilar.

Hisobot-saylov konferensiyasida taftish komissiyasining hisoboti ham tinglandi. Muzokaralarda kasaba uyushmasi qo‘mitasining faoliyati delegatlar tomonidan qoniqarli deb baholandi. Muqobillik asosida yashirin ovoz berish yo‘li bilan o‘tkazilgan saylov natijalariga ko‘ra Bahromjon Ibaydullaev besh yil muddatga raislikka saylandi.

Konferensiyada Sog‘liqni saqlash xodimlari kasaba uyushmasi Respublika Kengashi bosh mutaxassisi Dilorom Toshmatova, Sog‘liqni saqlash xodimlari kasaba uyushmasi Farg‘ona viloyat Kengashi raisi Shohidaxon Karimova, O‘zbekiston kasaba uyushmalari Federatsiyasi Farg‘ona viloyati Kengashi raisi o‘rinbosari Lolaxon Ahmedova, Respublika shoshilinch tibbiy yordam ilmiy markazi Farg‘ona filiali direktori Sherali Yo‘ldoshev va 48 nafar delegatlar ishtirok etdilar.

Shuningdek, O‘zbekiston sog‘liqni saqlash xodimlari kasaba uyushmasi Farg‘ona viloyati Kengashi raisi Shohidaxon Karimova konferensiya ishtirokchilariga bu yil kasaba uyushmalar harakatiga 120 yil to‘lishi, uning tarixi, bugungi kundagi o‘rni haqida ma’lumot berib o‘tdi.

O‘zbekiston kasaba uyushmalari Federatsiyasining Farg‘ona viloyati Kengashi