Previous Next

03.04.2025. So‘nggi yillarda kasaba uyushmalari faoliyatida rivojlanish va o‘sish kuzatildi, desak mubolag‘a bo‘lmaydi. Bugungi kunda O‘zbekistonda faoliyat yuritayotgan tashkilot, korxona va muassasalarda xodimlarning tashabbusi bilan boshlang‘ich kasaba uyushmalari tashkil etilib, samarali faoliyat olib bormoqda.

Bu yil fevral’-aprel’ oylarida boshlang‘ich kasaba uyushmalari tashkilotlarida besh yillik faoliyat yakunlari sifatida hisobot-saylov yig‘ilishlari va konferensiyalari o‘tkazilmoqda.

O‘zbekiston kimyo va farmasevtika sanoati xodimlari kasaba uyushmasi tizimidagi Toshkent kimyo-texnologiya instituti kasaba uyushmasi tashkilotining hisobot-saylov konferensiyasi bo‘lib o‘tdi.

Konferensiyada Kimyo va farmasevtika sanoati xodimlari kasaba uyushmasi Respublika kengashi raisining o‘rinbosari Ibrohim Isoqov, tashkiliy ishlar bo‘yicha bosh mutaxassis Bahrom Quvatov, Toshkent kimyo-texnologiya institutining yoshlar masalalari va ma’naviy-ma’rifiy ishlar bo‘yicha birinchi prorektori B. Boborajabov, institut kasaba uyushmasi qo‘mitasi raisi Abdusattor Abduraxmonov hamda institut fakul’tetlaridan saylangan delegatlar ishtirok etdilar.

Konferensiyada Toshkent kimyo-texnologiya instituti kasaba uyushmasi qo‘mitasining 2020–2025 yillar davomida olib borilgan faoliyati yakunlari, xodimlarning kelgusidagi ijtimoiy-iqtisodiy manfaatlarini amalga oshirish va ularning huquqiy himoyasini ta’minlash yuzasidan ish beruvchi vakili, kasaba uyushmasi qo‘mitasi raisi va taftish komissiyasining hisobotlari eshitildi.

Ma’ruzalar yakunlanganidan so‘ng muhokamaga o‘tildi. Delegatlar tomonidan kasaba uyushmasi qo‘mitasining hisobot davridagi faoliyati “qoniqarli” deb baholandi va taftish komissiyasining hisoboti tasdiqlandi.

Konferensiya kun tartibiga ko‘ra tashkiliy masalalar ham ko‘rib chiqildi. Ochiq ovoz berish yo‘li bilan muqobillik asosida Toshkent kimyo-texnologiya instituti boshlang‘ich kasaba uyushmasi qo‘mitasi raisi lavozimiga ko‘pchilik ovoz bilan Abdurahmonov Abdusattor Qahhorovich saylandi. Shuningdek, kasaba uyushmasi qo‘mitasi va taftish komissiyasi tarkibi hamda Kimyo va farmasevtika sanoati xodimlari kasaba uyushmasi Respublika kengashining IV Qurultoyiga delegat saylandi.

Konferensiyada Respublika kengashi vakillari tomonidan O‘zbekiston kasaba uyushmalari Federatsiyasi tomonidan amalga oshirilayotgan ishlar va O‘zbekiston kasaba uyushmalarining 120 yilligini munosib o‘tkazish bo‘yicha fikr va mulohazalar bildirildi.

Delegatlar tomonidan bildirilgan fikr va takliflarni inobatga olgan holda kelgusidagi faoliyat uchun ustuvor vazifalar belgilab olindi.

Shavkat Toirov

Kimyo va farmasevtika sanoati xodimlari kasaba uyushmasi Respublika kengashi raisining yoshlar masalalari bo‘yicha maslahatchisi