Previous Next

17.03.2025. O‘zbekiston kasaba uyushmalari federatsiyasi Toshkent viloyati kengashining 2025-yil I yarim yillik ish rejasiga asosan, bugun Yuqori Chirchiq tumani “Sultonravot” madaniyat markazida “Mehnat muhofazasi – xodimning xavfsizligi va ish samaradorligi asosi” mavzusida amaliy seminar o‘tkazildi.

Mazkur seminarga “Ta’lim va fan xodimlari kasaba uyushmasi” Yuqori Chirchiq tuman kengashi, kasaba uyushmasiga a’zo tashkilotlar – maktabgacha va maktab ta’limi muassasalari ish beruvchilari, boshlang‘ich kasaba uyushma qo‘mitasi raislari hamda mehnat muhofazasi bo‘yicha mas’ul xodimlar taklif etildi.

Seminarda O‘zbekiston kasaba uyushmalari federatsiyasi Toshkent viloyati kengashi raisi o‘rinbosari O‘. Rashidov, O‘zbekiston ta’lim va fan xodimlari kasaba uyushmasi Respublika kengashining mehnat muhofazasi bo‘yicha bosh mutaxassisi D. Samarbekov, Toshkent viloyati bandlik bosh boshqarmasi Davlat mehnat inspeksiyasi mehnatni muhofaza qilish bo‘yicha davlat texnik inspektori M. Mirxomidov, “O‘zagrosug‘urta” AJ Toshkent viloyati filiali rahbari o‘rinbosari M. Qaldibaev, O‘zbekiston kasaba uyushmalari federatsiyasi Toshkent viloyati kengashi mehnat-huquq inspektori M. Mirzaev va mehnat-texnik inspektori Sh. Xazratqulov ishtirok etdi.

Ushbu seminarda so‘zga chiquvchi mas’ullar tomonidan mehnat muhofazasi bo‘yicha ta’lim sohasidagi muammolar, ishlab chiqarishdagi baxtsiz hodisalar va ularning oldini olish bo‘yicha chora-tadbirlar, ish beruvchining fuqarolik javobgarligini majburiy sug‘urtalash ahamiyati, “O‘zbekiston Respublikasining Mehnat kodeksi”ga kiritilgan o‘zgartirishlar to‘g‘risida ma’ruza qilindi.

Seminar ishtirokchilari kerakli ma’lumotlarni olib, o‘z savollariga to‘liq javoblar oldilar.