Спартакиада барчага хуш кайфият бағишлади !!!

30.01.2017. Ўзбекистон Касаба уюшмалари Федерацияси ташаббуси билан “Спорт –саломатлик гарови” шиори остида ўтказилаётган Республика спартакиадасининг дастлабки босқичлари Бухоро санъат коллежи ҳамда Бухоро муҳандислик-технология институтида бўлиб ўтди.

Спортнинг 6 тури – бадминтон, баскетбол, шахмат, шашка, сузиш, стол тенниси бўйича ташкил этилган спартакиада мусобақаларида Бухоро санъат коллежида меҳнат қилаётган 104 нафардан зиёд ходим иштирок этди. Меҳнат жамоаси вакиллари 4 гуруҳга, яъни “Эстрада”, “Маъмурият”, “Актёрлар” ва “Рассомлар” номли гуруҳларга бўлинган ҳолда куч синашдилар.

Кўтаринки руҳда ўтган спартакиада якунига кўра, волейбол бўйича мусобақаларда “Эстрада” гуруҳи 1-, “Маъмурият” гуруҳи 2-, “Актёрлар” гуруҳи 3-, “Рассомлар” гуруҳи 4-ўринни эгаллади.

Шахмат мусобақаларида коллеж ходимларидан Малоҳат Раҳматова, Абдураҳмон Акрамов, шашка беллашувларида Мастура Исматова, Илҳом Исмоилов, стол тенниси мусобақаларида Лайло Каримова, Жалол Ражабовга омад кулиб боқиб, ғолибликни қўлга киритдилар.

Бухоро муҳандислик-технология институтида ташкил этилган спорт байрамида иштирок этган 200 нафардан зиёд ходимлар мусобақалар давомида юқори жисмоний тайёргарликка эга эканликларини намоён этдилар. Умумжамоа ҳисобида “Кимёвий технология” факультети жамоасига 1-ўрин, “Электротехника ва ишлаб чиқаришда ахборот технологиялари тизимлари” факультети жамоасига 2-ўрин, “Муҳандислик техника” факультети жамоасига 3-ўрин насиб этди.

Спартакиада мусобақалари давомида меҳнат фахрийларининг фаоллиги ҳам яққол кўзга ташланди. Хусусан, шахмат бўйича куч синашган ходимлар ўртасида меҳнат фахрийларидан “Умумий физика” кафедраси профессори Солех Астанов, кадрлар бўлими инспектори Матлаб Темиров юқори натижаларга эришиб, ёшларга ибрат кўрсатдилар.

Мусобақаларнинг ғолиб ва совриндорлари касаба уюшма қўмитасининг эсдалик совғалари билан рағбатлантирилди.