16.05.2015. Жорий йилнинг 16 май куни Ўзбекистон касаба уюшмалари Федерацияси Кенгаши ташаббуси билан анъанавий равишда ташкил этиб келинаётган “Касаба – ТУР” ходимлар веломарафонининг Республика босқичи ўтказилди. Таъкидлаш зарурки, жорий йилда “Касаба – ТУР” веломарафони иштирокчилари сони ўтган йилга нисбатан 2 баробарга ортди. Яъни, “Саломатлик акцияси” тарзида ўтказилган мазкур веломарафонда 900 нафардан ортиқ меҳнаткашлар иштирок этдилар.

Корхона, ташкилот ва муассасаларда фаолият кўрсатаётган  ходимлар ва уларнинг оила аъзолари ўртасида соғлом турмуш тарзи барқарорлигини таъминлашга йўналтирилган “Касаба-ТУР” веломарафони тўрт босқичда ташкил этилиб, жорий йилнинг март-апрель ойларида веломарафоннинг қуйи босқичлари ўтказилди. Уларда Қорақалпоғистон Республикаси,  вилоятлар ва Тошкент шаҳридаги 12594 та корхона, ташкилот ва муассасаларнинг 428 минг нафардан ортиқ ходимлари – ҳаваскор велоспортчилар қатнашдилар. Уларнинг 84 минг нафарини хотин-қизлар, 300 нафардан ортиғини меҳнат фахрийлари, ёши улуғ инсонлар ташкил этди.

“Касаба – ТУР” ходимлар веломарафонини ўтказишдан асосий мақсад – меҳнаткашлар ўртасида спортнинг оммавийлигини ошириш, меҳнат жамоаларида соғлом турмуш тарзини тарғиб этиш, бу орқали ходимлар ва уларнинг оила аъзолари саломатлигини мустаҳкамлашдир. Шунингдек, турли соҳа ходимлари ўртасида ўзаро дўстлик алоқаларини янада мустаҳкамлаш, уларнинг мазкур спорт турига бўлган қизиқишларини ошириш ҳамда экологик тоза транспорт турини оммалаштириш ҳам ташкилотчиларнинг диққат марказида бўлди.

Веломарафоннинг Республика босқичида Қорақалпоғистон Республикаси, вилоятлар ва Тошкент шаҳар босқичларида ғолиб бўлган меҳнаткашлар иштирок этдилар.

Иштирокчиларнинг ҳаракатланиши давомида веломарафон масофаси оралиғида таниқли спортчилар, санъаткорлар, ёш ижрочилар ва бадиий ҳаваскорлик дасталари, маданият ходимлари иштирокида соғлом турмуш тарзини тарғиб этишга қаратилган маданий тадбирлар ҳам ўтказилди. Қизғин ва дўстона беллашувлар остида ўтган мазкур спорт байрамига турли тармоқлар тизимидаги корхона, ташкилот ва муассасалар ходимлари, маҳаллалардаги аҳоли ҳамда ёшлар ҳам кенг жалб этилди.

Марафон мусобақаларида 20-35 ёшлилар, шунингдек, 35 ва ундан катта ёшдаги ҳаваскор велоспортчилар белгиланган пойга йўналишларини босиб ўтдилар. Мусобақаларга профессионал велоспорт усталарининг кўргазмали чиқишлари янада файз киритди. Нуфузли ҳакамлар ҳайъати томонидан ғолиблар аниқлангунга қадар спорт байрами иштирокчилари эътиборига таниқли санъаткорлар ва ёш ижрочилар, бадиий жамоаларнинг чиқишлари намойиш этилди.

“Касаба – ТУР” веломарафони якунлари бўйича эркаклар ва аёллар ўртасида ўтказилган мусобақаларда ғолиб бўлган ҳаваскор велоспортчилар ёш тоифалари бўйича 1-, 2- ва 3-ўринлар учун Ўзбекистон касаба уюшмалари Федерацияси Кенгаши томонидан таъсис этилган махсус диплом ва совғалар билан тақдирландилар.

Шунингдек, веломарафонда қўшимча номинациялар бўйича ҳам ғолиблар аниқланди. Хусусан, эркак ва аёллар ўртасида “Энг ёши улуғ пойгачи”, “Энг маҳоратли  пойгачи”, “Ғалабага бўлган интилиши учун”, “Энг ёш пойгачи”, “Энг фаол аёл пойгачи” номинациялари бўйича ғолиблар Касаба уюшмалари Федерацияси Кенгашининг рағбатлантирувчи мукофотларига сазовор бўлдилар.

Энг муҳими барча иштирокчилар соғлом рақобат муҳитида велоспорт бўйича ўз маҳоратларини кўрсатибгина қолмай, касб йўналишлари бўйича тажриба алмашиб, ўзлари фаолият кўрсатаётган корхона, ташкилот ва муассасада ходимлар спортини янада ривожлантириш бўйича фикр ва мулоҳазалар билан ўртоқлашиш имконига ҳам эга бўлдилар.

Асосий номинациялар бўйича ғолиблари: 

Ўринлар бўйича ғолиблар:

3-ўрин совриндорлари 

2-ўрин совриндорлари

1-ўрин совриндорлари

 “КАСАБА-ТУР” КУБОГИ СОВРИНДОРИ: Умумжамоа хисобида Тошкент шахар жамоаси кубок сохиби бўлди

            Ўзбекистон касаба уюшмалари Федерацияси Кенгаши Матбуот хизмати