21.09.2017. Ўзбекистон Республикаси Вазирлар Махкамасининг 2017 йил 29 аппрелдаги 08/1-591-сонли “Атоқли давлат арбоби ва ёзувчи Шароф Рашидов таваллудининг 100 йиллигини нишонлаш бўйича чора-тадбирлар режаси” ижроси юзасидан Ўзбекистон касаба уюшмалари Федерацияси томонидан ҳам тизимли ишлар амалга оширилмоқда.

Хусусан, Шароф Рашидов хотирасига бағишланган маънавий-маърифий тадбирлар, учрашув ва давра суҳбатлари, спорт турнирлари шулар жумласидандир.

Куни кеча Шароф Рашидов туғилиб ўсган тумандаги корхона, ташкилот ва муассасаларда фаолият кўрсатаётган ходимлар ўртасида Жиззах вилояти касаба уюшмалари ташкилотлари Бирлашмаси томонидан мини-футбол бўйича спорт турнири ташкил этилди.

Ушбу спорт мусобақаларининг биринчи босқичида Ш.Рашидов туманидаги 103 та корхона, ташкилот ва муассасаларда меҳнат қилаётган 2 минг нафарга яқин ходим иштирок этди. Қизғин мусобақаларда сараланган  88 нафар ишчи-хизматчи – ҳаваскор спортчилар турнирнинг туман босқичида иштирок этиш ҳуқуқини қўлга киритдилар.

Хотира турнирининг туман босқичи жорий йилнинг 15 сентябрь куни Жиззах шаҳри марказидаги “Ҳалқлар дўстлиги” шох кўчасида жойлашган мини-футбол спорт майдонлари комплексида ўтказилди.

Мусобақаларнинг  туман  босқичига йўлланма олган 11 та мини-футбол бўйича спорт жамоалари стадионда мусиқа садолари остида саф тортишди ва очилиш маросимини вилоят касаба уюшмалари ташкилотлари бирлашмаси Кенгаши раиси Нусратилла Пардаев кириш сўзи билан очиб берди. Шундан сўнг Ш.Рашидов туманидаги “Қуёшсевар Парда” фермер хўжалиги раҳбари, Ўзбекистон қахрамони Парда Зиётов, 29-сонли умумтаълим мактаби директори ўринбосари Акмал Пўлатовлар сўзга чиқиб, атоқли давлат арбоби ва ёзувчи Шароф Рашидовнинг ҳаёти, амалга оширган ишлари тўғрисида тўлқилланиб гапирдилар.

Дўстона муҳитда ўтган ҳамда қизғин беллашувларга бой бўлган мусобақалар якунига кўра 1-ўрин тумандаги 50-сонли умумтаълим мактаби мини-футбол жамоасига насиб этди ва улар Шароф Рашидов сиймоси туширилган кубокни қўлга киритдилар.

Турнирда фахрли 2-ўринни туман тиббиёт бирлашмаси, 3-ўринни эса 29-сонли умумтаълим мактаби спорт жамоаси эгаллади.

Ўзбекистон касаба уюшмалари Федерацияси Матбуот хизмати