14.10.2019. «Муборак иссиқлик электр маркази» акциядорлик жамиятида 480 нафар ходим меҳнат қилади. Корхонада ходимларнинг бўш вақтини мазмунли ўтказиш учун барча имкониятлар ишга солинмоқда. «Маънавият хонаси», спорт зали, мини-футбол майдончасидан унумли фойдаланиляпти. Халқаро хотин-қизлар куни, Наврўз, Хотира ва қадрлаш куни, Мустақиллик байрамларида маданий-маърифий тадбирлар уюштирилиб, уларда жамоа аъзоларидан ташкил топган мусиқий гуруҳ фаол иштирок этади. Хотин-қизлар ўртасида турли кўрик-танловлар ташкил этилиши ҳам ишчанлик кайфияти ортишига хизмат қилмоқда.
Корхона жамоаси кўплаб спорт мусобақаларида фаол қатнашаётир. Яқинда Муборак туманидаги турдош корхоналар, ташкилот ва муассасалар ўртасида ўтказилган мини-футбол бўйича мусобақада жамоа учинчи ўринни эгаллади.
Ходимларни вақти-вақти билан юртимизнинг қадимий шаҳарларига саёҳатларга олиб бориш анъанага айланган. Шунингдек, соғломлаштириш ишларига ҳам алоҳида эътибор қаратилади. Хусусан, жорий йилнинг тўққиз ойида 55 нафар ходимга турли сиҳатгоҳларга йўлланмалар берилди. Бундан ташқари, тумандаги «Маржон» сиҳатгоҳида 25 нафар ходим саломатлигини тиклади.
Сирасини айтганда, касаба уюшмасининг фаол саъй-ҳаракатлари жамоанинг ишчанлик кайфиятини ошириб, меҳнат унумдорлигини юксалтирмоқда.

Тошболта Авазов
«Муборак иссиқлик электр маркази» АЖ касаба уюшма қўмитаси раиси