21.10.2020. “ENTER Engineering” компаниясининг Қашқадарё вилояти Ғузор туманида “Uzbekistan GTL” заводини қураётган ишчилари томонидан 2020 йилнинг 21 октябрь куни уюштирилган норозиликлар сабабини аниқлаш, аниқланган камчилик ва муаммоларни бартараф этиш бўйича зарур амалий ёрдам кўрсатиш мақсадида Ўзбекистон касаба уюшмалари Федерацияси раиси ўринбосари Қобилжон Қирғизалиев бошчилигида тузилган Ишчи гуруҳи воқеа жойига етиб бориб, иш бошлади.

Ишчи гуруҳи таркибига Ўзбекистон касаба уюшмалари Федерацияси Инспекциясининг меҳнат ҳуқуқ ҳамда меҳнат техник инспекторлари, шу билан бирга  тегишли йўналишдаги мутахассислари киритилган.

Касаба уюшмалари Федерацияси Ишчи гуруҳининг масъул мутахассислари корхонада ходимларнинг ижтимоий-меҳнат соҳасидаги барча муаммолари бўйича таҳлилий ўрганишларни амалга оширади ва ўрганиш натижалари бўйича қўшимча ахборот берилади.