23.03.2023. Касаба уюшма ташкилотлари томонидан жойларда “Аёлни эъзозлаш – эзгулик ва адолат мезони” деган ғоя остида “Хотин-қизларни эъзозлаш ҳафталиги” доирасида тизимли ишлар амалга оширилди. Хусусан, касаба уюшма ташкилотлари ва иш берувчилар ҳамкорлигида меҳнат жамоаларида хотин-қизлар ўртасида спортнинг шахмат, шашка, стол тенниси, волейбол каби турлари бўйича спорт мусобақалар ташкил этилди. Қорақалпоғистон Республикаси, вилоятлар ва Тошкент шаҳридаги корхона, ташкилот ва муассасаларда меҳнат қилаётган хотин-қизлар ўртасида “Спорт – нафислик ва саломатлик манбаи!” шиори остида спортнинг волейбол, шахмат-шашка, бадминтон ҳамда стол тенниси турлари бўйича ўтказилган мусобақаларда 41 минг нафардан ортиқ хотин-қиз иштирок этди. Мазкур мусобақалар ғолиблари ва иштирокчилари иш берувчилар ва касаба уюшмалари томонидан муносиб рағбатлантирилди.

Шунингдек, Бухоро вилоятида “Хотин-қизларни эъзозлаш ҳафталиги” доирасида корхона, ташкилот ва муассасаларда ишловчи аёллар ўртасида спортнинг оммавий турлари бўйича ўтказилган мусобақаларда 250 дан ортиқ хотин-қизлар иштирок этдилар.

Ўзбекистон касаба уюшмалари Федерациясининг Сурхондарё вилоят кенгаши томонидан аёллар ўртасида шахмат ва шашка мусобоқалари ўтказилди.

Корхона, ташкилот ва муассасаларда фаолият кўрсатаётган хотин-қизлар ўртасида соғлом турмуш тарзини тарғиб этиш, уларнинг спорт билан шуғулланишлари учун етарли шарт-шароитларни яратиш, спорт-соғломлаштириш тадбирлари орқали меҳнаткашлар саломатлигини мустаҳкамлаш ва спортнинг оммавийлигини ошириш мақсадида бу каби мусобақлар ходимлари ўртасида мунтазам равишда ўтказиб келиняпти.

Ўзбекистон транспорт, йўл ва капитал қурилиш, қурилиш индустрияси ходимлари касаба уюшмасининг Навоий вилоят Кенгашига аъзо бўлган йирик ташкилотлардан бири – “Қизилқумцемент” АЖда ҳам хотин-қизлар ўртасида бир қатор спорт мусобақалари ўтказилди.

Навоий вилояти Экология ва атроф – мухитни  муҳофаза қилиш бошқармаси ва Навоий шаҳар “Гидро станко сервис” маъсулияти чекланган жамиятида ташкил этилган спорт мусобақалари байрам тадбирига уланиб кетди.

Шунингдек, Давлат муассасалари ва жамоат хизмати ходимлари касаба уюшмасининг Навоий вилоят Кенгашига аъзо бўлган Навоий вилояти Божхона бошқармаси, Навоий вилояти ИИБ, Хатирчи туман Ободонлаштириш бошқармалари ҳамкорлигида “Бешработ болалар спорт мажмуаси”да
хотин-қизлар ўртасида спортнинг шахмат, шашка, ҳамда стол тенниси турлари бўйича спорт мусобақалари ўтказилди.

Худди шу каби спорт тадбирлари “Навоиазот” АЖда  меҳнат қилаётган хотин-қизлар ўртасида ҳам ўтказилди.

Ўзбекистон касаба уюшмалари Федерацияси Матбуот хизмати