![[:uz]Ўзбекистон касаба уюшмалари Федерациясининг Портали[:ru]Портал Федерации Профсоюзов Узбекистана[:oz]Oʻzbekiston kasaba uyushmalari Federasiyasining Portali[:uzl]Oʼzbekiston kasaba uyushmalari Federatsiyasining Portali[:]](https://kasaba.uz/wp-content/uploads/2024/04/cropped-ohirgi-logo_kasaba_v13-removebg-preview.png){kind=logo}
Ўзбекча 
Русский
12.08.2024. Ўзбекистон металлургия ва машинасозлик саноати тармоқлари ходимлари касаба уюшмаси республика Кенгаши томонидан анъанавий тарзда ўтказиб келинаётган спартакиада тармоқ ходимлари ўртасида соғлом турмуш тарзини тарғиб қилишга хизмат қилиб келмоқда.
Мустақиллигимизнинг 33 йиллиги олдиган Аҳмад ал-Фарғоний дам олиш масканида ўтказилган спартакиаданинг Фарғона вилоят босқичи анча қизғин ва муросасиз кечди.
Ушбу мусобақада тармоқ тасарруфидаги корхона ва ташкилотларда меҳнат қилаётган 200 нафарга яқин тармоқ ишчи-ходимлари иштирок этдилар.
Улар спортнинг мини футбол, стол тенниси, дартс, шахмат, шашка, сузиш турлари бўйича беллашдилар. Ғолиб бўлиш ҳеч кимга осонликча насиб этмади. Ҳар бир иштирокчи мусобақага жиддий тайёргарлик кўргани майдонда яққол билинди.
Якунда эса ғолиблик кучлиларга насиб этди. Жамоавий бахсда футбол мусобақасида 1-ўрин “UzSungwoo” МЧЖ қўшма корхонаси йигитларига насиб қилган бўлса, ақл гимнастикаси ҳисобланган шахмат мусобақасида аёллар ўртасидаги бахсда “Автоойна” МЧЖ ишчиси Нигора Мамажонова рақибларидан кучли эканлигини исботлади.
— Мен ушбу спартакиадада стол тенниси мусобақасида биринчиликни қўлга киритдим. Бундан жуда ҳам ҳурсандман, — дейди “Med oil metan” МЧЖ шарафини ҳимоя қилган Абдуллох Абдуллаев. — Чунки, бу мусобақада биринчи бор иштирок этишим эди. Энди тайёргарликни янада кучайтириб, республика босқичида ҳам ғолиб бўлиш ниятидаман.
“Автоойна” МЧЖнинг яна бир ходими Зулайҳо Зубайдуллаева аёллар ўртасида ўтказилган стол тенниси мусобақасида тенгсизлигини намойиш этиб, ғолибга айланди.
— Мусобақада ғолиб бўлганим бежизга эмас. Сабаби иш жойимда эркаклар қатори, аёлларнинг спорт билан шуғулланишлари учун барча шароитлар яратилган. Бу биз учун ҳар томонлама фойдали бўлмоқда, — дейди “Автоойна” МЧЖ харидлар бўлими мутахассиси Зулайҳо Зубайдуллаева.
Мусобақа ғолиблари ва фаол иштирокчилар Ўзбекистон металлургия ва машинасозлик саноати тармоқлари ходимлари касаба уюшмаси республика Кенгашининг эсдалик совғалари билан тақдирландилар. Шу тариқа мусобақа ғолиблари республика босқичида иштирок этиб, ғолиблик учун беллашадилар.