Previous Next

21.02.2025. Ҳисобот-сайлов йиғилишлари ва конференциялари бошланғич касаба уюшмаси ташкилоти фаолиятида муҳим воқеликдир.2025 йил касаба уюшмалари тизимида ҳисобот-сайловлар йили эканлиги боис мазкур жараёнда ўтган беш йилликдаги фаолият сарҳисоб қилиниб, эришилган натижалар таҳлил этилмоқда.

“Ўзбекистон почтаси” Акциядорлик жамиятининг “Тошкент почтамти” филиали бошланғич касаба уюшма ташкилоти ҳисобот-сайлов конференциясида ҳам ўтган ҳисобот даврида касаба уюшма ташкилоти томонидан меҳнаткашлар манфаатлари йўлида амалга оширилган ишлар, эришилган натижалар, шу билан бир қаторда, фаолиятни ташкил этишда қандай камчиликларга йўл қўйилгани чуқур таҳлил қилиниб, келгусидаги устувор вазифалар белгилаб олинди.

Даставвал филиал жамоа шартномасининг 2024 йилдаги ижроси юзасидан иш берувчи вакили ҳисобот берди. Шундан сўнг касаба уюшма қўмитаси раиси “Ўзбекистон почтаси” АЖ “Тошкент почтамти” филиали касаба уюшма қўмитасининг 2020-йил февралдан 2025-йил февралгача бўлган давр мобайнидаги фаолияти тўғрисида конференция иштирокчилари бўлган ходимларга батафсил маълумот берди. Касаба уюшма ташкилоти тафтиш комиссиясининг ҳисоботи тингланди.

Таъкидланганидек, филиал бошланғич касаба уюшма ташкилоти томонидан ўтган ҳисобот даврида Филиал, боғлама ва алоқа бўлимлари ходимларининг ижтимоий-иқтисодий манфаатларини ҳимоя қилиш, уларнинг тўлиқ бандлигини таъминланиши ҳамда соғлом ва қулай меҳнат шароитлари яратиб берилишига эришиш, меҳнат қонунчилигига риоя этилиши устидан жамоатчилик назоратини амалга ошириш, ходимларни соғломлаштириш, ходимлар ўртасида маданий-маърифий, спорт ва интеллектуал тадбирларни ташкил этиш соҳасида муайян ишлар амалга оширилди. Хусусан, 2020 йилда жамоа шартномаси орқали ҳар бир ходимга сарфланган маблағ миқдори ўртача 1 миллион 399 минг сўмни ташкил этган бўлса, 2024 йилда бу кўрсаткич 4 миллион 471 минг сўмга етди. 2020 йил давомида ходимларга берилган моддий ёрдам миқдори  532 миллион сўмни ташкил этган бўлса, 2024 йил  якунига кўра ходимларга берилган моддий ёрдам миқдори 1 млрд. 598 миллион сўмга етди.

Бундан ташқари ҳисобот даврида филиалнинг 29 та бўлими, Почта алоқа боғламалари ва 115 та алоқа бўлимлари 22 млн. сўмлик дори- дармонлар билан таъминланди. Ходимларни суғурталаш учун 91 млн. сўмдан ортиқ маблағ ажратилди. Ходимларни махсус кийим-бош билан таъминлаш мақсадида 692 млн. 421 минг сўм йўналтирилди. Филиал  ходимлари  кўп тармоқли тиббий кўрикдан бепул ўтказилди.

Ишдан ташқари ёзги дам олиш кунларини мароқли ва мазмунли ўтказиш мақсадида Тошкент вилоятининг Бўстонлиқ туманида жойлашган «Нилуфар» дам олиш масканида  меҳнаткашлар ҳордиғи ташкил этилди. Ходимлар саломатлигини мустаҳкамлаш мақсадида касаба уюшмалари тизимидаги “Оқтош”, “Зомин”, “Чинобод”, “Косонсой”, “Турон”, “Ботаника”, “Бўстон”, “Хумсон” ва “Чимён” сиҳатгоҳларига имтиёзли йўлланмалар билан таъминландилар.

Шунингдек, «Ўзбекистон бўйлаб саёҳат қил!» ва «Мен юртимни севаман!» шиорлари остида қадимий ва навқирон Самарқандга, Ислом маданияти пойтахти бўлган Бухорога, очиқ осмон остидаги –  музей Хивага, хушманзара тоғли ҳудудларга ходимларнинг сайёҳатлари ташкил этилди.  Ходимларнинг 7-14 ёшгача бўлган фарзандлари ёзги таътилда “Конструктор” ва “Алоқачи” оромгоҳларида соғломлаштирилди. Меҳнаткашлар ва улар фарзандлари учун турли кўрик-танловлар, спорт мусобақалари, истироҳат боғларига, театр ва концертларга ташрифлар уюштирилди.  Почта сохасида узоқ йиллар самарали меҳнат қилиб, пенсияга чиққан нуронийлар холидан хабар олиниб, совға-саломар, озиқ-овқат маҳсулотлари топширилди.

Ҳисобот-сайлов конференциясида кўрилган масалалар юзасидан музокараларда сўзга чиққан делегатлар томонидан “Ўзбекистон почтаси”  АЖ “Тошкент почтамти” филиали касаба уюшмаси қўмитасининг ҳисобот давридаги фаолияти қониқарли деб топилиб, тафтиш комиссияси ҳисоботи тасдиқланди.

Шундан сўнг конференция кун тартибига мувофиқ касаба уюшма қўмитаси раиси сайлаб олинди. Маълумки, “Ўзбекистон касаба уюшмалари Федерацияси тизимидаги касаба уюшмалари ташкилотларида ҳисобот-сайловларни ўтказиш тўғрисида Низом”га мувофиқ бошланғич ташкилотлар сайланма органларининг ишлаб чиқаришдаги ишидан озод этилган раиси сайлови муқаррар равишда муқобиллик асосида, яширин овоз бериш йўли билан ўтказилиши белгиланган. Шунга кўра делегатлар томонидан касаба уюшма қўмитаси раислигига муқобиллик асосида 2 кишининг номзоди илгари сурилди. Яширин овоз бериш натижаларига кўра филиалнинг амалдаги касаба уюшма қўмитаси раиси Назокат Каримова кўпчилик овоз билан “Ўзбекистон почтаси”  АЖ “Тошкент почтамти” филиали касаба уюшмаси қўмитаси раиси этиб сайланди. Шунингдек, бошланғич касаба уюшма қўмитасининг 5 кишидан иборат таркиби, тафтиш комиссияси таркиби ва раиси сайланди. Қўмитага сайланган ҳар бир аъзога дублёр танланди.

Ҳисобот-сайлов конференцияси давомида Ўзбекистон ахборот технологиялари ва оммавий коммуникация ходимлари касаба уюшмаси Қурултойига ҳамда Ўзбекистон  касаба уюшмалари Федерациясининг Тошкент шаҳар кенгаши Конференциясига делегатлар сайлаб олинди.

Конференция якунида “Ўзбекистон почтаси”  АЖ “Тошкент почтамти” филиали директори Шухрат Атамуҳамедов сўзга чиқиб, касаба уюшма қўмитаси билан ҳамкорликда келгусида ҳам меҳнат жамоаси манфаатларини ҳимочлаш билан бирга “Ўзбекистон-2030” стратегиясини амалга ошириш жараёнида фаол иштирок этишларини алоҳида таъкидлади. Ходимларнинг ижтимоий-иқтисодий ҳуқуқ ва манфаатларини ҳимоялаш борасида келгусидаги устувор вазифалар белгилаб олинди.

Муҳаббат Ўрмонбекова

Ўзбекистон касаба уюшмалари Федерацияси Матбуот хизмати раҳбари