Previous Next

21.02.2025. O‘zbekiston kimyo va farmasevtika sanoati xodimlari kasaba uyushmasi tizimidagi “Andijon biokimyo zavodi” AJ boshlang‘ich kasaba uyushmasi tashkilotining hisobot-saylovi bo‘lib o‘tdi.

Hisobot-saylovda “Andijon biokimyo zavodi” AJ boshqaruvi raisining birinchi o‘rinbosari A. Irmatov, tarmoq kasaba uyushmasi Respublika kengashining tashkiliy ishlar bo‘yicha bosh mutaxassisi B. Quvatov, O‘zbekiston kasaba uyushmalari Federatsiyasining Andijon viloyat kengashi raisining o‘rinbosari N. Abduraxmonova, kasaba uyushmasi qo‘mitasi raisi S. Qodirov, korxonaning mas’ul xodimlari va sexlardan saylangan delegatlar ishtirok etdilar.

Tarmoq kasaba uyushmasi Respublika kengashining tashkiliy ishlar bo‘yicha bosh mutaxassisi B. Quvatov O‘zbekiston kasaba uyushmalari Federatsiyasi tomonidan olib borilayotgan ishlar, “O‘zbekiston kasaba uyushmalarining 120 yilligi” bayrami to‘g‘risida va Respublika kengashi tomonidan amalga oshirilayotgan ishlar yuzasidan so‘zladi.

Konferensiya kun tartibiga ko‘ra, kasaba uyushmasi qo‘mitasi raisi Sanjarbek Qodirovning o‘tgan 5 yil davomida olib borilgan faoliyat yakunlari to‘g‘risidagi hisoboti va kasaba uyushmasi qo‘mitasi faoliyati yuzasidan taftish komissiyasining hisoboti eshitildi.

Ma’lumotlarga ko‘ra, jamoa shartnomasiga asosan har bir xodimga haq to‘lanadigan qo‘shimcha ta’tillar berish, mehnat ta’tiliga chiqish vaqtida ijtimoiy-maishiy yordam ko‘rsatish, ovqatlanish xarajatlarini qoplash, yaqin qarindoshlarining vafoti munosabati bilan hamda kam ta’minlangan oilalar vakillariga moddiy yordam ajratish, bayram sanalari munosabati bilan moddiy rag‘batlantirish, yil yakuni bo‘yicha mukofotlash, sanatoriylarga va bolalarni sog‘lomlashtirish oromgohlariga imtiyozli yo‘llanmalar berish kabi bandlarning ijrosi ta’minlanib kelingan.

Delegatlar tomonidan ma’ruzachilarning o‘qib eshittirilgan hisobotlari muhokama qilinib, “qoniqarli” deb baholandi va taftish komissiyasining hisoboti tasdiqlandi.

Shundan so‘ng, vakolat muddatining tugashi munosabati bilan boshlang‘ich kasaba uyushmasi qo‘mitasi raisi, uning tarkibi, taftish komissiyasi tarkibi va raisi, shuningdek, yuqori kasaba uyushmasi organiga delegatlar saylandi.

Yashirin ovoz berish yo‘li bilan muqobillik asosida o‘tkazilgan saylovda ko‘pchilik ovoz bilan Qodirov Sanjarbek Axmadjonovich “Andijon biokimyo zavodi” AJ kasaba uyushmasi qo‘mitasining raisi etib saylandi.

Shavkat Toirov

Kimyo va farmasevtika sanoati xodimlari kasaba uyushmasi Respublika kengashi raisining yoshlar masalalari bo‘yicha maslahatchisi