Previous Next

15.03.2025. Ўзбекистон касаба уюшмалари Федерациясида Таиланд Қироллигининг Бангкок шаҳрида бўлиб ўтган хоккей бўйича U-18 Жаҳон чемпионатида иштирок этиб, ғолибликни қўлга киритган Ўзбекистон касаба уюшмалари Федерацияси хоккей жамоасининг мураббий ва спортчилари билан учрашув бўлиб ўтди.

Ўзбекистон касаба уюшмалари Федерацияси раиси Қудратилла Рафиков тадбирни Ўзбекистон Республикаси Президенти Шавкат Мирзиёевнинг Франция Республикасига давлат ташрифи доирасида юз берган тарихий хушхабар билан бошлади. Хусусан, Федерация раиси мазкур ташриф доирасида Париж шаҳрида  Ўзбекистон Республикаси Президенти Шавкат Мирзиёев Франция Президенти Эммануэль Макрон томонидан тантанали равишда Франция Республикасининг олий мукофоти – Фахрий легион ордени билан тақдирланганини юксак фахр ва эҳтиром билан алоҳида таъкидлади ҳамда мамлакатимиздаги 7 миллиондан ортиқ касаба уюшма аъзолари ва фаоллари бундай қувончли хабарни чуқур ҳурмат ва зўр мамнуният билан қарши олганларини билдирди.

– Давлатимиз раҳбарининг икки мамлакат ҳамкорлигини ривожлантириш, халқларимиз ўртасидаги дўстлик ва ўзаро англашувни мустаҳкамлашга қўшган улкан ҳиссаси учун ушбу юксак мукофотга сазовор бўлгани бутун Ўзбекистон халқини, шу жумладан, барча касаба уюшма аъзолари ва фаолларини бирдек қувонтирди, – деди жумладан, Ўзбекистон касаба уюшмалари Федерацияси раиси Қудратилла Рафиков. – Дунё миқёсида саноқли шахсларгина сазовор бўлган мазкур орденнинг Ўзбекистон Республикаси Президентига топширилиши – Давлатимиз раҳбари томонидан олиб борилаётган одилона ва оқилона сиёсатнинг, шунингдек, Янги Ўзбекистонда барча соҳаларда бирдек амалга оширилаётган туб ислоҳотлар самарасининг дунё ҳамжамиятидаги навбатдаги эътирофи бўлди. 7 миллионлик касаба уюшма аъзолари ва фаоллари номидан муҳтарам Президентимизни бундай юксак эътироф ва натижа билан самимий қутлаймиз.

Шундан сўнг учрашувда Янги Ўзбекистондаги хоккей ишқибозларининг кўп йиллик орзуларини рўёбга чиқарган ғалаба – ёш хоккейчиларимизнинг Таиланд Қироллигининг Бангкок шаҳрида бўлиб ўтган хоккей бўйича U-18 Жаҳон чемпионатида чемпионлик унвонини қўлга киритгани алоҳида қайд этилди.

Таъкидлаш зарурки, ўзбек хоккей спорти тарихидаги мазкур оламшумул ютуқларга эришишда Ўзбекистон касаба уюшмалари Федерациясининг “Муз устида хоккей бўйича ихтисослаштирилган болалар ва ўсмирлар спорт мактаби” ўқувчиларидан ташкил топган Ўзбекистон ёш хоккейчилар жамоаси Жанубий Африка, Люксенбург, Туркманистон, Босния-Герцеговина, Тайланд каби давлатларнинг кучли хоккей жамоаларини енгиб, чемпионликни кўлга киритдилар ва ўзбек хоккей спорти тарихида янги саҳифа очиб бердилар.

Ўзбекистон жамоасининг жаҳон чемпионатидаги ўйинлари ёш хоккейчиларимизнинг юқори профессионал маҳоратга ва барча рақибларидан бир-неча поғона устунликка эга эканликларини намойиш этди. Хусусан, Ўзбекистон ёш хоккейчилар жамоаси Жанубий Африка жамоасини – 12:0, Люксембург  жамоасини  – 12:1, Туркманистон жамоасини – 8:2, Босния – Герцеговина жамоасини – 11:3, мезбон бўлган Тайланд жамоасини эса 3:2 хисобда мағбул этиб, мутлоқ ғолибликни кўлга киритди.

Шунингдек, чемпионатнинг 14 та голи (шайбаси) ва 8 та узатиши натижасига кўра Жасурбек Рустамхонов “Энг яхши ҳужумчи” ва “Энг яхши ўйинчи” номинациясини, Рустам Иргашев эса “Энг яхши дарбозабон” номинациясини қўлга киритди.

Учрашувда қайд этилганидек, Ўзбекистон ёшларининг жаҳон ареналарида эришаётган мана шундай тарихий ютуқлари ва муваффақиятлари Муҳтарам Президентимиз ташаббуслари билан Янги Ўзбекистонда жисмоний тарбия ва спортни ривожлантириш, профессионал спортчиларни танлаш ва тайёрлаш бўйича олиб борилаётган кенг кўламли ислоҳотларнинг амалий самарасидир.

Жаҳон чемпионати – ёш хоккейчиларимиз учун чинакам ирода, жасорат ва матонат мактаби бўлди. Шижоатли ёшларимиз ғоят кескин беллашувларда юксак марраларни эгаллаб, Жаҳон чемпионати мусобақаларининг ҳақиқий қаҳрамонларига айланди.

Шундан сўнг юксак ғалабани қўлга киритган Ўзбекистон касаба уюшмалари Федерациясининг хоккей жамоаси ёш спортчилари ва уларнинг мураббийлари Касаба уюшмалари Федерацияси томонидан муносиб рағбатлантирилди ва уларга табрикнома ҳамда пул мукофотлари топширилди.

Ўз навбатида Ўзбекистоннинг ёш ҳоккейчилари Президентимиз ташаббуслари билан спортнинг мазкур турини ривожлантириш мақсадида амалга оширилаётган саъй-ҳаракатлар ва яратилаётган имкониятлар учун миннатдорчилик билдириб, келгусида Давлатимиз байроғини бундан-да юксакларга кўртаришга, Мадҳиямизнинг дунё ареналарида янграшига, юртимиз нуфузини янада юксак босқичларга олиб чиқишда муносиб ҳисса қўшишга ваъда бердилар.

Муҳаббат Ўрмонбекова

Ўзбекистон касаба уюшмалари Федерацияси Матбуот хизмати раҳбари