Previous Next

01.04.2025. Жорий йилнинг 24 март куни Ўзбекистон касаба уюшмалари Федерациясининг Сирдарё вилояти кенгаши мажлислар залида Сирдарё вилоят болалар кўп тармоқли тиббиёт марказининг 2023-2025 йиллар учун тузилган жамоа шартномаси мажбуриятларининг 2024 йилдаги ижроси юзасидан меҳнат жамоасининг конференцияси бўлиб ўтди.

Конференцияда муассаса бош шифокор ўринбосари С. Ярматов, касаба уюшмаси қўмитаси раиси Н. Олимжонова, 6 нафар ижтимоий-меҳнат масалалари бўйича комиссия аъзолари, 31 нафар делегат, 19 нафар меҳнат жамоаси вакиллари, Ўзбекистон Соғлиқни сақлаш ходимлари касаба уюшмаси Республика кенгашининг ижтимоий ҳимоя масалалари бўйича бош мутахассиси Д. Рўзиева, меҳнат техника ва ҳуқуқ инспекторлари А. Ғаниев, А. Албеков ҳамда тармоқ касаба уюшмасининг ҳудудий кенгаши бухгалтери М. Ахмедов иштирок этдилар.

Конференцияда бош шифокор ўринбосари ҳамда касаба уюшмаси қўмитаси раисининг ҳисоботлари маълумот учун қабул қилинди, ижтимоий-меҳнат масалалари бўйича комиссия раиси Б. Исматовнинг далолатномаси тасдиқланди.

Маълумот учун, 2024 йил давомида жамоа шартномаси бандларининг бажарилиши учун ўрта ҳисобда бир ходимга сарфланган маблағ 10 млн 667 минг сўмни ташкил этиб, ўтган йилдагига нисбатан 15% га ўсган. Жумладан, меҳнат муҳофазаси бўйича ўртача 1 млн 600 минг сўм сарфланган. Ҳуқуқи тикланган 1 нафар ходимнинг смена асосидаги меҳнат фаолияти иш ставкасига асосан амалга оширилишига эришилган. Касаба уюшмаси аралашуви билан 55 та иш ўрни аттестациядан ўтказилган ва 55 та иш ўрнидаги 180 нафар ходимнинг ҳуқуқлари тикланган.

Конференцияда жамоа шартномасининг ижроси қизғин муҳокама қилинди ва фаолияти қониқарли деб топилди.

Шундан сўнг, муассаса касаба уюшма ташкилотининг ҳисобот-сайлов конференцияси ўтказилди. Кун тартибидаги масалалар муҳокама этилди, ҳисоботлар тингланди. Сирдарё вилоят болалар кўп тармоқли тиббиёт маркази касаба уюшма ташкилотининг ўтган беш йиллик ҳисобот давридаги фаолиятига бир овоздан қониқарли баҳо берилди. Муқобиллик асосида ўтган сайловда амалдаги касаба уюшмаси қўмитасининг раиси Н. Олимжонова янги муддатга қайта сайланди.

Йиғилишда “Ўзбекистонда касаба уюшмалари ҳаракатининг 120 йиллиги” кенг нишонланиши юзасидан республикамизда олиб борилаётган кенг кўламли тадбирлар тўғрисида батафсил маълумот берилди.