Previous Next

02.04.2025. Республика шошилинч тиббий ёрдам илмий маркази Фарғона филиали бошланғич касаба уюшма ташкилотининг ҳисобот-сайлов конференцияси бўлиб ўтди.

Даставвал, Республика шошилинч тиббий ёрдам илмий маркази Фарғона филиали касаба уюшма қўмитаси раиси Баҳромжон Ибайдуллаев касаба уюшма томонидан ўтган беш йил давомида амалга оширилган ишлар, аъзоларга қандай кўмак кўрсатилгани, уларни қўллаб-қувватлаш йўлида олиб борилган ишлар бўйича маълумот берди.

Таъкидланганидек, ишчи-ходимларнинг меҳнат муҳофазаси, ижтимоий ҳимояси ва саломатлигини мустаҳкамлаш маъмурият ва касаба уюшма қўмитасининг эътиборида бўлиб келди. Қолаверса, ишчи-ходимларни қўллаб-қувватлаш, моддий ва маънавий кўмак кўрсатиш жамоа шартномасида ўз аксини топган бўлиб, ундаги бандларнинг ижросига жиддий эътибор қаратилди.

Хусусан, ходимлар имтиёзли йўлланмалар орқали турли сиҳатгоҳларда саломатлигини мустаҳкамлади. Бир сўз билан айтганда, касаба уюшма томонидан аъзоларни ҳар томонлама қўллаб-қувватлаш ишларига катта эътибор қаратилди.

Ўтган давр мобайнида кам таъминланган, эҳтиёжманд, боқувчисини йўқотган 707 нафар ходимга моддий ёрдам кўрсатилди. Яқин қариндошлари вафот этган 45 нафар ходимга озиқ-овқат маҳсулотларидан иборат кўмак берилди. Эҳтиёжманд оила вакилларининг 536 нафар фарзандига янги ўқув йили бошланиши арафасида мактаб ўқув-қуроллари совға қилинди. 260 нафар ходимлар ва уларнинг яқин қариндошлари турли сиҳатгоҳларда дам олиб, саломатлигини мустаҳкамладилар. Ишчи-ходимларнинг 187 нафар фарзандлари ёзги соғломлаштириш оромгоҳларида ҳордиқ чиқариш имконига эга бўлдилар.

Ҳисобот-сайлов конференциясида тафтиш комиссиясининг ҳисоботи ҳам тингланди. Музокараларда касаба уюшмаси қўмитасининг фаолияти делегатлар томонидан қониқарли деб баҳоланди. Муқобиллик асосида яширин овоз бериш йўли билан ўтказилган сайлов натижаларига кўра Баҳромжон Ибайдуллаев беш йил муддатга раисликка сайланди.

Конференцияда Соғлиқни сақлаш ходимлари касаба уюшмаси Республика Кенгаши бош мутахассиси Дилором Тошматова, Соғлиқни сақлаш ходимлари касаба уюшмаси Фарғона вилоят Кенгаши раиси Шоҳидахон Каримова, Ўзбекистон касаба уюшмалари Федерацияси Фарғона вилояти Кенгаши раиси ўринбосари Лолахон Аҳмедова, Республика шошилинч тиббий ёрдам илмий маркази Фарғона филиали директори Шерали Йўлдошев ва 48 нафар делегатлар иштирок этдилар.

Шунингдек, Ўзбекистон соғлиқни сақлаш ходимлари касаба уюшмаси Фарғона вилояти Кенгаши раиси Шоҳидахон Каримова конференция иштирокчиларига бу йил касаба уюшмалар ҳаракатига 120 йил тўлиши, унинг тарихи, бугунги кундаги ўрни ҳақида маълумот бериб ўтди.

Ўзбекистон касаба уюшмалари Федерациясининг Фарғона вилояти Кенгаши