Previous Next

03.04.2025. Сўнгги йилларда касаба уюшмалари фаолиятида ривожланиш ва ўсиш кузатилди, десак муболаға бўлмайди. Бугунги кунда Ўзбекистонда фаолият юритаётган ташкилот, корхона ва муассасаларда ходимларнинг ташаббуси билан бошланғич касаба уюшмалари ташкил этилиб, самарали фаолият олиб бормоқда.

Бу йил февраль-апрель ойларида бошланғич касаба уюшмалари ташкилотларида беш йиллик фаолият якунлари сифатида ҳисобот-сайлов йиғилишлари ва конференциялари ўтказилмоқда.

Ўзбекистон кимё ва фармацевтика саноати ходимлари касаба уюшмаси тизимидаги Тошкент кимё-технология институти касаба уюшмаси ташкилотининг ҳисобот-сайлов конференцияси бўлиб ўтди.

Конференцияда Кимё ва фармацевтика саноати ходимлари касаба уюшмаси Республика кенгаши раисининг ўринбосари Иброҳим Исоқов, ташкилий ишлар бўйича бош мутахассис Баҳром Қуватов, Тошкент кимё-технология институтининг ёшлар масалалари ва маънавий-маърифий ишлар бўйича биринчи проректори Б. Боборажабов, институт касаба уюшмаси қўмитаси раиси Абдусаттор Абдурахмонов ҳамда институт факультетларидан сайланган делегатлар иштирок этдилар.

Конференцияда Тошкент кимё-технология институти касаба уюшмаси қўмитасининг 2020–2025 йиллар давомида олиб борилган фаолияти якунлари, ходимларнинг келгусидаги ижтимоий-иқтисодий манфаатларини амалга ошириш ва уларнинг ҳуқуқий ҳимоясини таъминлаш юзасидан иш берувчи вакили, касаба уюшмаси қўмитаси раиси ва тафтиш комиссиясининг ҳисоботлари эшитилди.

Маърузалар якунланганидан сўнг муҳокамага ўтилди. Делегатлар томонидан касаба уюшмаси қўмитасининг ҳисобот давридаги фаолияти “қониқарли” деб баҳоланди ва тафтиш комиссиясининг ҳисоботи тасдиқланди.

Конференция кун тартибига кўра ташкилий масалалар ҳам кўриб чиқилди. Очиқ овоз бериш йўли билан муқобиллик асосида Тошкент кимё-технология институти бошланғич касаба уюшмаси қўмитаси раиси лавозимига кўпчилик овоз билан Абдураҳмонов Абдусаттор Қаҳҳорович сайланди. Шунингдек, касаба уюшмаси қўмитаси ва тафтиш комиссияси таркиби ҳамда Кимё ва фармацевтика саноати ходимлари касаба уюшмаси Республика кенгашининг IV Қурултойига делегат сайланди.

Конференцияда Республика кенгаши вакиллари томонидан Ўзбекистон касаба уюшмалари Федерацияси томонидан амалга оширилаётган ишлар ва Ўзбекистон касаба уюшмаларининг 120 йиллигини муносиб ўтказиш бўйича фикр ва мулоҳазалар билдирилди.

Делегатлар томонидан билдирилган фикр ва таклифларни инобатга олган ҳолда келгусидаги фаолият учун устувор вазифалар белгилаб олинди.

Шавкат Тоиров

Кимё ва фармацевтика саноати ходимлари касаба уюшмаси Республика кенгаши раисининг ёшлар масалалари бўйича маслаҳатчиси