Previous Next

20.06.2025. O‘tgan yilning dekabr’ oyida Qirg‘iziston kasaba uyushmalari Federatsiyasi raisi boshchiligidagi delegasiyaning O‘zbekistonga tashrifi chog‘ida imzolangan «O‘zbekiston kasaba uyushmalari Federatsiyasi bilan Qirg‘iziston kasaba uyushmalari Federatsiyasi o‘rtasida hamkorlik to‘g‘risidagi kelishuv»ga muvofiq, shu kunlarda Qirg‘iziston kasaba uyushmalari Federatsiyasining bir guruh mehnat huquq va mehnat texnik inspektorlari yurtimizda malaka oshirdi.

Jumladan, O‘zbekiston kasaba uyushmalarilari Federatsiyasining Malaka oshirish institutida tashkil etilgan o‘quv kursi «Mehnat muhofazasi va texnika xavfsizligi» hamda «Kasaba uyushmalari faoliyatini tashkil etish» yo‘nalishlarida bo‘lib o‘tdi.

Mashg‘ulotlarda ishtirokchilar o‘zlarini qiziqtirgan savollarga batafsil javoblar olishdi.

– Menga O‘zbekiston kasaba uyushmasi tizimidagi juda ko‘plab tajribalar manzur bo‘ldi, – deydi Qirg‘iziston kasaba uyushmalari Federatsiyasi mehnat huquq inspektori Aziza Asanbekova.

– Jumladan, tizimda yagona raqamli platforma yaratilgani va unda barcha hisobotlar, topshiriqlar va tahlillar joylanib borishi juda yoqdi. Bu ishni soddalashtiribgina qolmay, shaffoflikni ham ta’minlaydi. Normativ-huquqiy hujjatlar bazasi – lex.uz ning mavjudligi, kasaba uyushmalari tizimida ham qonunchilik hujjatlari bazasi ijtimoiy tarmoqlar, telegram kanallarga joylanib, Federatsiyaning faoliyati har taraflama ochiq yoritilishi yaxshi ekan. Ma’ruzachilarning mehnat muhofazasini tashkil etish, jamoatchilik nazoratini olib borish va uning huquqiy asoslariga bag‘ishlangan darslari biz uchun juda foydali bo‘ldi.

Qirg‘izistonlik hamkasblar, shuningdek, mamlakatimizda amalga oshirilayotgan bunyodkorlik ishlari bilan ham yaqindan tanishdilar. Xususan, poytaxtimizdagi «G‘alaba bog‘i», «Toshkent sity» majmuasi, O‘zbekiston kasaba uyushmalari tarixi muzeyi hamda Mehnat va ijtimoiy munosabatlar akademiyasi mehmonlarda katta taassurot qoldirdi.

Zebo Namozova