Previous Next

25.06.2025. Ёшлар — ҳар қандай жамиятнинг таянчи, ҳаракатлантирувчи кучи ва эртанги кун бунёдкоридир. Мамлакатимизда 30 июнь санасининг “Ёшлар куни” сифатида эълон қилиниши ҳам айнан шу ҳақиқатнинг амалий ифодасидир. Президентимизнинг ташаббуси билан жорий этилган ушбу байрам ёшларга бўлган юксак эътибор, уларни ҳар томонлама қўллаб-қувватлаш ва салоҳиятини юзага чиқаришга қаратилган изчил сиёсат самарасидир.

Ёшлар куни муносабати билан мамлакатимизда амалга оширилаётган кенг кўламли ислоҳотларга бефарқ бўлмаган, ўзининг билими, қобилияти, интилувчанлиги, ташаббускорлиги ва самарали меҳнати билан фаоллик кўрсатаётган ёшлар ўртасида “Заковат” интеллектуал ўйинларини ўтказиш яхши анъанага айланди.

“30 июнь – Ёшлар куни”ни муносиб нишонлаш, иқтидорли ёшларнинг мантиқий билимларини ошириш, уларни интеллектуал ўйинларга кенг жалб қилиш ва қизиқтириш, ёшларни ҳар томонлама қўллаб-қувватлаш, рағбатлантириш, ижтимоий-сиёсий билимларини мустаҳкамлаш ҳамда жамоавий руҳни юксалтириш мақсадида Ўзбекистон энергетика, нефт-газ ва геология ходимлари касаба уюшмаси Республика Кенгаши томонидан тармоқ тизимидаги ёшлар ўртасида “Бизнес-квиз” интеллектуал ўйини чемпионатига старт берилди.

Таъкидлаш жоизки, ушбу чемпионат бир марталик тадбир бўлиб қолмай, 2025 йил июнь ойидан 2026 йил май ойигача давом этувчи йиллик интеллектуал чемпионат сифатида ташкил этилган. Якуний финал босқичини “Ўзбекистон энергетика ҳафталиги – UEW 2026” доирасида ўтказиш режалаштирилган.

Жорий йилнинг 20 июнь куни чемпионатнинг биринчи босқич ўйинлари бўлиб ўтди. Унда тармоқ тизимида фаолият юритаётган ёшлардан ташкил топган жами 22 та жамоа иштирок этди.

Қизғин ва муросасиз баҳс-мунозараларга бой тарзда ўтган биринчи босқич натижалари қуйидагича тақсимланди:

• 1-ўрин — “LUKOIL Uzbekistan Operating Company” жамоаси;

• 2-ўрин — “UzGasTrade” МЧЖ жамоаси;

• 3-ўрин — “Ўзбекнефтгаз” АЖ жамоаси.

Ғолиб ва совриндор жамоалар тармоқ касаба уюшмаси Республика Кенгаши томонидан фахрий ёрлиқлар ва эсдалик совғалари билан тақдирланди.

Чемпионат ёшларнинг билим даражасини ошириш, уларни стратегик фикрлашга, жамоавий ишлашга ва интеллектуал рақобатда фаол иштирок этишга рағбатлантиришга хизмат қилади. Шу билан бирга, бу каби тадбирлар орқали тармоқ ташкилотлари ўртасида ҳамкорлик ва дўстона муҳит мустаҳкамланади.

“Бизнес-квиз” — бу шунчаки ўйин эмас, балки ёшларнинг билимини синовдан ўтказиш, рағбатлантириш ва ўз соҳасига бўлган иштиёқини янада оширишга хизмат қилувчи самарали воситадир. Бундай тадбирлар орқали биз нафақат бугунги, балки эртанги куннинг пешқадам мутахассисларини тайёрлаб борамиз. Зеро, келажагимиз — ёшлар қўлида!