Previous Next

31.07.2025. Ўзбекистон касаба уюшмалари Федерацияси ва унга аъзо бўлган тармоқ касаба уюшмалари томонидан ишловчиларнинг меҳнат ҳуқуқлари ҳамда ижтимоий-иқтисодий манфаатларини ҳимоялаш борасида кенг кўламли ишлар амалга оширилмоқда. Буни касаба уюшмаларига аҳолидан келиб тушаётган мурожаатлар ва уларнинг ижобий ҳал этилаётгани тўғрисидаги фактлар ҳам кўрсатиб турибти.

Хусусан, яқинда “Ҳудудий электр тармоқлари” Акциядорлик жамиятининг Самарқанд ҳудудий филиалида вужудга келган муаммо ва касаба уюшмалари томонидан унинг ижобий ҳал этилганини мисол қилиб келтириш мумкин.

2025 йилнинг июнь ойи бошида “Ҳудудий электр тармоқлари” Акциядорлик жамиятининг Самарқанд ҳудудий филиалида ишловчи 348 нафар ходим ишдан озод этилиб, “Ўзбекистон Миллий электр тармоқлари” Акциядорлик жамиятининг Самарқанд Миллий электр тармоқлари филиалига ишга қабул қилинди. Бироқ, аввалги иш жойидан уларнинг якуний ҳисоб-китоб пули ҳамда фойдаланилмаган меҳнат таътиллари учун компенсация тўловлари амалга оширилмагани ишчиларнинг норозилигини келтиритб чиқарди. Ушбу муаммони қонуний ҳал этишда амалий ёрдам сўраб меҳнаткашлар Ўзбекистон касаба уюшмалари Федерацияси Ишонч телефони орқали жамоавий мурожаат билан чиқдилар.

Мурожаат юзасидан 2025 йилнинг 10 июль куни Ўзбекистон энергетика, нефт-газ ва геология ходимлари касаба уюшмаси Республика Кенгаши Меҳнат инспекцияси масъул ходимлари Бобурмирзо Абдуллаев ва Алишер Имомов жойига чиқиб, ишчи-ходимлар билан учрашдилар ва очиқ мулоқотлар ўтказдилар. Юзага келган муаммо чуқур ўрганилиб, 300 нафардан ортиқ ходим билан мулоқотлар чоғида уларнинг саволларига ҳуқуқий тушунтиришлар берилди.

Олиб борилган ўрганишлар натижасида ходимларни “Ўзбекистон Миллий электр тармоқлари” Акциядорлик жамиятининг Самарқанд магистрал электр тармоқлари филиали таркибига ўтказишда меҳнат қонунчилигига риоя этилмагани, иш берувчи томонидан ходимлар билан тузилган меҳнат шартномасини бекор қилиш билан боғлиқ якуний ҳисоб-китоб тўловлари ҳамда фойдаланилмаган таътил пули берилмагани аниқланди.

Шундан сўнг тармоқ касаба уюшмаси Меҳнат инспекцияси томонидан меҳнаткашларнинг манфаатларини ҳимоя қилган ҳолда иш берувчига расмий кўрсатма хати киритилди. Натижада иш берувчи барча ходимлар билан қайтадан келишув шартномаларини расмийлаштирди ва якуний ҳисоб-китоб ишларини амалга оширди. Шунингдек, меҳнаткашларга таътил учун компенсацияларни тўлаш бўйича буйруқлар ҳам чиқарилди.

Бир сўз билан айтганда, Энергетика, нефт-газ ва геология ходимлари касаба уюшмаси Республика Кенгаши саъй-ҳаракатлари билан 344 нафар ишчи-ходимнинг меҳнат ҳуқуқлари тикланиб, улар фойдасига жами 4 миллиард 647 миллион сўм тўлов пуллари ундириб берилди.

Шу билан бирга қонунбузарликларга йўл қўйганлиги учун тармоқ касаба уюшмаси Республика Кенгаши томонидан “Ҳудудий электр тармоқлари” Акциядорлик жамиятининг Самарқанд ҳудудий филиали Юридик ҳамда Ходимлар билан ишлаш бўлими бошлиғига нисбатан интизомий чоралар кўриш бўйича расмий тақдимнома ҳам киритилди.

Бир корхонада юзага келган ушбу муаммо Касаба уюшмалари саъй-ҳаракатлари натижасида ижобий ҳал этилиб, 344 нафар ходим ва улар ортида турган минглаб оила аъзоларига амалий ёрдам кўрсатилди.

Шу боис, ишчи-ходимлар Ўзбекистон касаба уюшмалари Федерацияси ва тармоқ касаба уюшмаси Меҳнат инспекцияси инспекторлари номига ўз миннатдорчиликларини билдириб, ташаккурномалар йўлламоқдалар. 

Ўзбекистон касаба уюшмалари Федерацияси Матбуот хизмати