[:uz]Ўзбекистон касаба уюшмалари Федерациясининг Портали[:ru]Портал Федерации Профсоюзов Узбекистана[:oz]Oʻzbekiston kasaba uyushmalari Federasiyasining Portali[:uzl]Oʼzbekiston kasaba uyushmalari Federatsiyasining Portali[:]

Сайт синов тариқасида ишга туширилган

29.08.2025. Мамлакатимиз Мустақиллигининг 34 йиллиги арафасида Ўзбекистон касаба уюшмалари томонидан мазкур Энг улуғ, энг азиз байрамга бағишланган туркум тадбирлар ўтказилмоқда. Уларда турли соҳаларда меҳнат қилаётган ходимлар, ёшлар ва меҳнат фахрийлари иштирок этмоқда.

Ана шундай тадбирлардан бири Ўзбекистон Кимё ва фармацевтика саноати ходимлари касаба уюшмаси Республика Кенгаши ҳамда “Ўзкимёсаноат” АЖ ҳамкорлигида ташкил этилди. “Ватан учун, миллат учун, халқ учун!” шиори остида ўтказилган спорт мусобақаларида соҳа ходимлари 2 босқичда спортнинг мини-футбол, стол тенниси, волейбол, баскетбол, гандбол ҳамда шахмат турлари бўйича куч  синашдилар.

Мусобақалардан кўзланган мақсад – Президентимизнинг “Жамоавий спорт турларини ривожлантириш ва иқтидорли ёшларни саралаб олиш тизимини такомиллаштириш чора-тадбирлари тўғрисида”ги Қарори ижросини таъминлаш, шунингдек, Ўзбекистон Республикаси давлат Мустақиллигининг 34 йиллик байрами ҳамда Ўзбекистон касаба уюшмалари ҳаракатининг 120 йиллиги арафасида меҳнаткашларга кўтаринки кайфият улашишдир.

Мусобақаларнинг тармоқ тизимидаги корхона, ташкилот ва муассасаларда ўтказилган 1-босқичида 2 мингга яқин ходимлар иштирок этдилар. Ҳар бир мусобақа ғолиблари корхоналар раҳбарияти ва бошланғич касаба уюшма қўмиталари томонидан муносиб рағбатлантирилди.

Мусобақаларнинг Республика босқичи Д.Менделеев номидаги Россия кимё технологиялари университетининг Тошкент шаҳар филиали спорт мажмуасида ўтказилди.

Унда 1-босқич мусобақаларида саралаб олинган ва ғолиб бўлган 140 га яқин иштирокчи беллашди.

Мусобақалар якунига кўра спортнинг шахмат, мини-футбол, баскетбол, волейбол, гандбол ва стол тенниси турлари бўйича ғолиблар ва совриндорларга Кимё ва фармацевтика саноати ходимлари касаба уюшмаси Республика Кенгаши ва “Ўзкимёсаноат” АЖ томонидан мукофотлар ва эсдалик совғалари топширилди.

Ўзбекистон касаба уюшмалари Федерацияси Матбуот хизмати