Previous Next

30.11.2025. O‘zbekiston kasaba uyushmalari Federatsiyasi tomonidan 2025 yilning 27–29 noyabr’ kunlari Toshkent shahridagi “Chinobod Plaza” sanatoriysida “Sanator-kurort davolash va tibbiy turizmning zamonaviy istiqbollari” mavzusida xalqaro ilmiy-amaliy konferensiya o‘tkazildi.

Keng qamrovli mazkur konferensiyani o‘tkazishdan asosiy maqsad — O‘zbekiston Respublikasi Prezidenti tashabbuslari bilan mamlakatimizda sanator-kurort sohasini modernizasiya qilish, tabiiy shifobaxsh omillar asosida davolash usullarini takomillashtirish, tibbiy turizm sohasida xalqaro hamkorlikni rivojlantirish yo‘nalishlarida amalga oshirilayotgan keng ko‘lamli ishlar va ularning natijalarini dunyo hamjamiyatiga yetkazish, mazkur yo‘nalishlarda o‘zaro tajriba almashish hamda ilmiy-tadqiqot natijalarini amaliyotga joriy etishdan iboratdir.

Xalqaro ilmiy-amaliy anjumanda jami 15 ta davlatdan, xususan, Rossiya Federatsiyasi, Belorus’, Vengriya, Chexiya, Isroil, Qozog‘iston, Tojikiston, Turkiya, Italiya, Ukraina, Ozarbayjon, Gruziya, Shveysariya kabi mamlakatlardan 40 nafarga yaqin horijiy mutaxassislar ishtirok etdilar. Ular tomonidan mavzuga oid 29 ta ma’ruza taqdim etildi.

Xalqaro anjumanning 1-kuni Konferensiyaning tantanali ochilish marosimi va yalpi majlisi bo‘lib o‘tdi. “Sanator-kurort tibbiyoti va reabilitasiya: global chaqiriqlar va milliy rivojlanish modellari” mavzuidagi Yalpi majlis davomida xalqaro va mahalliy ekspertlar ma’ruzalari tinglandi.

Ma’lumki, Sanator-kurort ishi va tibbiy turizm sohalaridagi zamonaviy tendensiyalar yangi  yondoshuvlar, innovasion yechimlar, an’anaviy tajriba va yangi ilmiy ishlanmalarning uyg‘un kombinasiyasini talab qiladi. Bugun sanator-kurort davolash va tibbiy turizm nafaqat jahon iqtisodiyotining bir qismiga, balki, o‘z salomatligini tiklash va farovonligini oshirishga intilayotgan odamlarning hayot sifatini oshirishning muhim omiliga aylanib borayotgan bir paytda mazkur ilmiy-amaliy konferensiyani o‘tkazish dolzarb ahamiyatga egadir.

Ma’lumki, har bir davlat o‘z fuqarolarining salomatliini muhofaza qilish va mustahkamlashni ta’minlashga intiladi. Xalqaro ilmiy-amaliy anjumanda ta’kidlanganidek, o‘tgan 9 yilda O‘zbekiston Respublikasi Prezidenti Shavkat Mirziyoev tashabbuslari bilan mamlakatimiz hayotining barcha jabhalarida amalga oshirilayotgan tub islohotlar doirasida Yangi O‘zbekistonda sog‘liqni saqlash, jumladan, sanator-kurort sohasi va tibbiy turizmni rivojlantirishga katta e’tibor qaratilmoqda. Mehnatkashlar va ularning oila a’zolari salomatligini mustahkamlash, jamiyatda sog‘lom turmush tarzi madaniyatini yuksaltirish, yangi ijtimoiy ob’ektlar barpo etish va ularning moddiy-texnik negizini mustahkamlash borasidagi tizimli ishlar izchil davom ettirilmoqda.

Mazkur jarayonlarda O‘zbekiston kasaba uyushmalari Federatsiyasi ham faol ishtirok etmoqda. Xususan, 2017 yilda O‘zbekiston kasaba uyushmalari Federatsiyasi tizimida 17 ta sanatoriy va dam olish uylari faoliyat ko‘rsatgan bo‘lsa, bugungi kunda ularning soni 33 taga yetdi. Shu bilan birga o‘rinlar soni 5 mingdan 8 mingtaga ko‘paydi. Natijada har yili qo‘shimcha ravishda 60 mingdan ortiq kishiga sanator-kurort xizmati ko‘rsatish imkoniyati yaratildi.

O‘zbekiston kasaba uyushmalari Federatsiyasi tizimida mavjud sanatoriylar infratuzilmasi to‘liq yangilandi, zamonaviy qo‘shimcha binolar, shu jumladan, davolash va yotoqxona binolari, ovqatlanish zallari, madaniyat va dam olish ob’ektlari, zamonaviy yopiq suzish havzalari barpo etildi.

Qayd etish joizki, yangi sanatoriylar barpo etish va mavjudlarini rekonstruksiya qilish sanator-kurort tarmog‘i rivojlanishi va talabiga muvofiq amalga oshirilmoqda. Ayni paytda Davlatimiz rahbari tashabbuslari bilan xalqaro tajriba va mahalliy iqlimni hisobga olgan holda yirik, markazlashgan sanator-kurort majmualari qurilmoqda. Shuningdek, horijda ham O‘zbekiston kasaba uyushmalari sanatoriylari tashkil etilmoqda. Xususan, O‘zbekiston va Qirg‘iziston Prezidentlarining siyosiy irodasi tufayli O‘zbekiston kasaba uyushmalari Federatsiyasi tomonidan 2025 yilda mashhur Issiqko‘l hududida umumiy maydoni qariyb 10 gektar bo‘lgan, barcha qulayliklarga ega, xalqaro standartlarga javob beradigan “Bo‘ston Rezort” sog‘lomlashtirish kurortining birinchi bosqichi foydalanishga topshirildi. Endilikda Ozarbayjon va Gruziyada ham shunday dam olish maskanlarini qurish rejalashtirilgan.

Yana bir ahamiyatli jihat shuki, yangi sanatoriylarning qurilishi va foydalanishga topshirilishi 1500 dan ortiq qo‘shimcha ish o‘rni yaratish imkonini berdi.

Bugungi kunda O‘zbekiston kasaba uyushmalari Federatsiyasi tizimidagi sanatoriylarda 4 mingga yaqin kishi, shu jumladan, 1200 nafar malakali shifokor va hamshiralar faoliyat ko‘rsatmoqda. So‘nggi 5 yil davomida tizimdagi sanatoriylarda 800 ming nafardan ortiq kishi sog‘lomlashtirildi. Ulardan 320 ming nafardan ortig‘i imtiyozli va bepul yo‘llanmalar asosida dam oldirildi.

O‘zbekistondagi sanatoriylarda dam olib, salomatligini mustahkamlash uchun horijlik fuqarolar tomonidan ham talab otib bormoqda. Xususan, mamlakatimiz kasaba uyushmalari tizimidagi sanatoriylarda 2017 yilda qariyb 300 nafar horij fuqarosi sog‘lomlashtirilgan bo‘lsa, 2025 yilga kelib 6,5 ming nafardan ortiq horijiy fuqarolarga davolash-sog‘lomlashtirish xizmati ko‘rsatildi.

Bugungi kunda rivojlangan davlatlarning xalqaro tajribasidan foydalanish sanatoriylarda zamonaviy davolash va sog‘lomlashtirish texnologiyalarini keng joriy etish imkonini bermoqda. Natijada sanatoriylarda dam oluvchilar soni yil sayin ko‘payib, xizmat ko‘rsatish sifati oshib bormoqda.

O‘zining shifobaxsh xususiyati bo‘yicha mashhur Truskoves, Borjomi, Karlovi Vari suvlari bilan qiyoslanadigan noyob iqlim sharoiti, tabiiy landshaftlar, mineral buloqlarga ega O‘zbekiston kasaba uyushmalari sanatoriylari odamlarga nafaqat dam olish, balki, salomatligini tiklash, immunitetini mustahkamlash imkonini bermoqda.

Konferensiya davomida ilg‘or tajribalar bilan o‘rtoqlashildi, O‘zbekistonning muvaffaqiyatli tajribalari o‘rganilib, ushbu muhim sohani yanada rivojalantirishning strategik yo‘nalishlari muhokama qilindi.

Yalpi majlisdan so‘ng xalqaro anjuman ishi ikkita seksiyada davom etdi. Birinchi seksiya ishtirokchilari “Markaziy Osiyoda reabilitasiya va sanator-kurort tibbiyoti”, ikkinchi seksiyadagi mutaxassislar “Reabilitasiyada innovasiyalar va interdisiplinar yondashuvlar” masalalarini muhokama etib, o‘zaro tajriba almashdilar. Seksiyalar ishi bo‘yicha xulosa va natijalar ko‘rib chiqilib, Xalqaro konferensiya Tavsiyalari loyihasi yuzasidan takliflar ishlab chiqildi.

Xalqaro ilmiy-amaliy Konferensiya davomida Trukiya, Italiya va Vengriyaning bal’neologiya assosiasiyalari bilan o‘zaro xalqaro hamkorlik bo‘yicha memorandumlar imzolandi. Shu bilan birga, tibbiy turizmni rivojlantirish bo‘yicha yangi qo‘shma loyihalarni amalga oshirish yuzasidan kelishuvlarga erishildi. Shuningdek, konferensiya yakunlari bo‘yicha sanator-kurort sohasini rivojlantirishga oid ilmiy takliflar, amaliy tavsiyalar ishlab chiqildi.

Anjumanning 2-kuni horijlik mutaxassislar O‘zbekiston kasaba uyushmalari Federatsiyasi tizimidagi “Sevarsoy” va “Oq tosh” sanatoriylari faoliyati bilan yaqindan tanishdilar. Bu yerda mehmonlar mehnatkashlar va ularning oila a’zolari salomatligini mustahkamlash va sog‘lomlashtirish uchun yaratilgan zamonaviy shart-sharoitlar, sanatoriylarning eng so‘nggi rusumdagi tibbiy-asbob uskunalar bilan ta’minlanganlik darajasiga yuqori baho berdilar. Jahon standartlari talablariga javob beruvchi davolash usullari, suv havzasi, tabiiy iqlim sharoitlarining yuqori samarasini e’tirof etdilar.

Shuningdek, mazkur sanatoriylar faoliyati bilan tanishuv jarayonida mehmonlarga so‘nggi yillarda O‘zbekiston kasaba uyushmalari Federatsiyasi tomonidan yangi sanatoriylarni barpo etish va foydalanishga topshirish, tizimda mavjud sanatoriylarni kapital ta’mirlash va rekonstrukiya qilish, qayta jihozlash va innovasion davolash texnologiyalarini joriy etish borasida amalga oshirilgan tizimli ishlar to‘g‘risida batafsil ma’lumotlar berildi.

Xalqaro ilmiy-amaliy anjuman doirasida horijiy ekspertlar uchun Samarqand shahriga madaniy-turistik sayohat ham tashkil etildi. Sayohat davomida konferensiya ishtirokchilari mamlakatimizning boy madaniy va tarixiy merosi bilan yaqindan tanishish imkoniyatiga ega bo‘ldilar.

Muhabbat O‘rmonbekova

O‘zbekiston kasaba uyushmalari Federatsiyasi Matbuot xizmati rahbari