Previous Next

25.12.2025. 2025 йил 23 декабрь куни Ўзбекистон Республикаси қонунчилиги талаблари ҳамда амалдаги тармоқ келишувига мувофиқ, «Ўзбеккўмир» АЖда Ўзбекистон энергетика, нефть-газ ва геология ходимлари касаба уюшмаси Республика Кенгаши томонидан меҳнатни муҳофаза қилиш соҳасида жамоатчилик назоратини кучайтириш ва касаба уюшмаси фаолларининг касбий тайёргарлигини оширишга қаратилган ўқув тадбири ўтказилди.

Ушбу тадбирни ташкил этишга Ўзбекистон Республикасининг 2016 йил 22 сентябрдаги «Меҳнатни муҳофаза қилиш тўғрисида»ги Қонунига (№410) киритилган ўзгартишлар ва қўшимчалар, шунингдек, Ўзбекистон энергетика, нефть-газ ва геология ходимлари касаба уюшмаси Республика Кенгашининг 2023–2025 йилларга мўлжалланган тармоқ жамоа келишуви ҳамда «Ўзбеккўмир» АЖнинг шу даврга мўлжалланган жамоа шартномаси асос бўлди. Ушбу ҳужжатларда меҳнатни муҳофаза қилиш бўйича вакилларни тизимли равишда ўқитиш ва жойларда самарали касаба уюшмаси назоратини ривожлантириш муҳимлиги алоҳида таъкидлаб ўтилган.

Тадбирда «Ўзбеккўмир» АЖ филиалларида меҳнатни муҳофаза қилиш талабларига риоя этилиши устидан жамоатчилик назоратини амалга ошираётган 73 нафар меҳнатни муҳофаза қилиш бўйича вакиллар ҳамда жамият тизимидаги касаба уюшмаси ташкилотлари вакиллари иштирок этди. Шунингдек, Ўзбекистон энергетика, нефть-газ ва геология ходимлари касаба уюшмаси Республика Кенгаши Меҳнат инспекциясининг бош меҳнат техник инспектори томонидан амалдаги меъёрий талабларнинг асосий жиҳатлари атрофлича тушунтирилди.

Мазкур ўқув тадбири касаба уюшмаси вакилларининг ҳуқуқий ва касбий саводхонлигини ошириш, меҳнат хавфсизлиги ҳамда соғлом меҳнат шароитларини таъминлашда уларнинг ўрни ва масъулиятини мустаҳкамлашга қаратилди. Шунингдек, у ишлаб чиқаришда бахтсиз ҳодисаларнинг олдини олишга хизмат қилади ва касаба уюшмаларининг ходимлар ҳаёти ҳамда соғлиғини ҳимоя қилиш принципларига садоқатини яна бир бор тасдиқлайди.