Previous Next

22.01.2026. 2026 yil 22 yanvar’ kuni O‘zbekiston kasaba uyushmalari Federatsiyasi apparatining mehnatni muhofaza qilish bo‘limining 2026 yil uchun mo‘ljallangan ish rejasiga asosan, soha mutaxassislarining malakasini oshirish, tarmoqlararo o‘zaro tajriba almashish maqsadida Toshkent shahrida joylashgan “Quyuv-mexanika zavodi” AJ faoliyatini o‘rganish maqsadida amaliy safar tashkil etildi.

Federatsiya apparatining mehnatni muhofaza qilish bo‘limining 2026 yildagi asosiy maqsadlaridan biri og‘ir sanoat sharoitida “Nol’ darajadagi jarohatlanish” (Vision Zero) konsepsiyasini joriy etish va zamonaviy xavfsizlik standartlarini amaliyotga tatbiq etish bo‘lib, turli xil tarmoqlardagi tashkilotlarga amaliy ravishda borib, tajriba almashishdan iborat.

“Quyuv-mexanika zavodi” AJ yirik sanoat ob’ekti hisoblanib, uning asosiy faoliyati yuk tashish vagonlarini to‘liq ta’mirlash, yuk tashish vagonlarini ishlab chiqarish, vagonlarga hamda boshqa turdagi qurilmalarga ehtiyot qismlarni ishlab chiqarish, murakkab metallokonstruksiyalarni yaratish, po‘lat, cho‘yan hamda boshqa rangli metallardan iborat detallarni quyishga qaratilgan bo‘lib, zavodda mehnat muhofazasi va xavfsizligi tizimining samaradorligini doimiy ravishda oshirib borish e’tibor talab qiladi.

Mehnat muhofazasi bo‘yicha mutaxassislarning ushbu amaliy safaridan ko‘zlangan asosiy maqsad zavodda joriy etilgan mehnatni muhofaza qilishni boshqarish tizimi, uning faoliyat ko‘rsatish tartibi, mehnat muhofazasi va gigienasi talablarini samarali bajarish, xavflarni identifikasiya qilish, kasbga oid xavf-xatarlarni baholash va boshqarish masalalarini tashkil etish amaliyotini o‘rganish, ilg‘or usullarni tahlil qilish hamda sohaga oid yangiliklar yuzasidan fikr almashishdan iborat bo‘ldi. Shu jumladan, ijtimoiy sheriklik asosida mehnatni muhofaza qilish bo‘yicha ma’muriy-jamoatchilik nazorati masalasi mutaxassislarning diqqat markazida bo‘ldi.

Amaliy safar davomida tarmoqlarning mehnat muhofazasi bo‘yicha mutaxassislari zavodning asosiy sexlari faoliyati bilan yaqindan tanishdilar. Bu yerda asosiy e’tibor quyidagi masalalarga qaratildi:

havo almashish (ventilyasiya) tizimlarining ishlashi;

xodimlarning shaxsiy himoya vositalari (ShHV) bilan ta’minlanishi;

zararli ishlab chiqarish omillarining oldini olish;

ishlab chiqarishdagi baxtsiz hodisalar va kasb kasalliklariga chalinishning oldini olish;

jamoa shartnomasining “Mehnatni muhofaza qilish” bo‘limi talablarining bajarilishi;

ish o‘rinlarini mehnat sharoitlari hamda asbob-uskunalarning jarohatlash xavfliligi yuzasidan attestasiyadan o‘tkazilganlik holati;

ish beruvchining fuqarolik javobgarligini majburiy sug‘urta qilish ishlari;

mehnatni muhofaza qilish ishlari hamda mehnatni muhofaza qilish xizmati faoliyati;

mehnatni muhofaza qilish bo‘yicha yo‘l-yo‘riq berish, o‘qitish va bilimlarni tekshirish, malaka oshirish hamda qayta tayyorlash ishlari;

mehnatni muhofaza qilish bo‘yicha yo‘riqnomalar ishlab chiqilganligi;

mehnatni muhofaza qilish bo‘yicha vakil saylanganligi va uning faoliyati tashkil etilganligi.

Shu bilan bir qatorda, zavodda 2025–2026 yillarga mo‘ljallangan modernizasiya dasturi doirasida eskirgan uskunalarni yangilash jarayoni davom etayotgan bo‘lib, bu nafaqat mahsulot sifatini oshirishga, balki kelajakda ishlab chiqarishdagi baxtsiz hodisalarning oldini olishga ham xizmat qiladi.

Tajriba almashish jarayonida faqat texnologiyalar emas, balki “xavfsizlik madaniyati” masalasi ham keng muhokama qilindi. Zavod mutaxassislari xodimlarni ruhiy va jismoniy jihatdan ishga tayyorlash, stress holatlarini boshqarish hamda baxtsiz hodisalarni simulyasiya qilish orqali o‘qitish bo‘yicha o‘z metodlarini namoyish etdilar.

Mehnat muhofazasi — bu faqat jarima yoki taqiq emas, bu har bir xodimning uyiga sog‘-salomat qaytishini ta’minlaydigan tizimdir. Bugungi tajriba almashish jarayoni boshqa korxonalardagi yangi yondashuvlarni ko‘rish va o‘z xatolarini tahlil qilish imkonini beradi.

Uchrashuv yakunida mutaxassislar tomonidan 2026 yil yakuniga qadar sanoat korxonalari o‘rtasida mehnat muhofazasi bo‘yicha yagona raqamli bazani yaratish va o‘zaro auditorlik tekshiruvlarini (kross-audit) yo‘lga qo‘yish bo‘yicha takliflar ilgari surildi.

Mehnatni muhofaza qilish bo‘limi