Previous Next

12.02.2026. Ўзбекистон касаба уюшмалари Федерациясининг 2026 йил биринчи ярим йиллигига мўлжалланган иш режасига мувофиқ, Навоий вилояти Кенгаши томонидан корхона ва ташкилотларда жорий йилнинг биринчи ярим йиллиги давомида “Хавфсиз меҳнат асослари” мавзусида семинар-тренинглар ўтказиш бўйича режа-жадвал ишлаб чиқилиб, тасдиқланди.

Режа-жадвалга асосан 10 февраль куни “Тинчлик локомотив депоси”да интерактив усулда семинар-тренинг ташкил этилди. Семинарда касаба уюшмалари Навоий вилояти Кенгаши раиси ўринбосари Х. Халилов, Кенгашнинг меҳнат-техник ва ҳуқуқий инспекторлари, Бухоро минтақавий темирйўл узели бошланғич касаба уюшмаси раиси М. Ҳакимов, Камбағалликни қисқартириш ва бандлик бошқармаси давлат меҳнат инспектори Ҳ. Худойқулов ҳамда темирйўл корхона ва ташкилотларидан жами 100 нафардан ортиқ меҳнат муҳофазаси бўйича масъул ходимлар, жамоатчи вакиллар ва касаба уюшмаси раислари иштирок этди.

Семинарда Ўзбекистон Республикаси Вазирлар Маҳкамасининг 2025 йил 24 декабрдаги 819-сон қарори (https://lex.uz/docs/-7942768) билан қабул қилинган тўртта низомнинг мазмун-моҳияти, “Хавфсиз меҳнатни таъминлашда касаба уюшмаларининг ўрни, ушбу соҳадаги норматив ҳужжатлар ижроси”, “Меҳнат муносабатларида норматив-ҳуқуқий ҳужжатларга риоя этилиши: муаммо ва ечимлар” ҳамда “Касаба уюшмалари тўғрисида”ги Қонун асосида касаба уюшмаларининг ҳуқуқлари ва уларнинг амалиётда қўлланилиши мавзуларида слайд намойиши орқали маърузалар қилинди.

Семинар иштирокчиларини қизиқтирган саволларга мутахассислар томонидан атрофлича жавоб берилди. Бу каби семинар-тренинглар корхона ва ташкилотларда режа бўйича давом этади.

М. Камбарова

Ўзбекистон касаба уюшмалари Федерациясининг Навоий вилояти Кенгаши меҳнат-техник инспектори