Previous Next

13.04.2026. Шерободлик Феруза Нормуродова иш берувчининг хатти-ҳаракатларидан норози бўлиб, Ўзбекистон касаба уюшмалари Федерациясининг Сурхондарё вилояти кенгашига мурожаат қилди. Аризасида ўзига нисбатан ноқонуний равишда интизомий жазо қўлланилганини билдириб, уни бекор қилишда ёрдам сўради.

Ўрганишлар мобайнида маълум бўлишича, Ф. Нормуродова 2013 йилдан буён Шеробод туманидаги 8-умумий ўрта таълим мактабида бошланғич синф ўқитувчиси сифатида ишлаб келмоқда. 2025 йил 18 декабрь куни ишга сабабсиз келмагани важи билан унга нисбатан «ҳайфсан» интизомий жазоси қўлланилган.

Иш берувчининг тушунтиришича, ўша куни ўқитувчи 2 соатга жавоб олган бўлса-да, қолган дарсларини ўтмагани учун далолатнома тузилиб, интизомий жазо тайинланган. Ф. Нормуродованинг тушунтиришига кўра эса, у ўша куни мактаб директоридан жавоб олган ва соғлиги ёмонлашгани туфайли ишга кела олмаган.

Меҳнат кодексининг 313-моддасига биноан, жазо қўллашдан олдин ходимдан ёзма тушунтириш хати олиниши керак. Иш берувчи шу талабни бажармай, хатога йўл қўйган. Шу боис фуқаролик ишлари бўйича Шеробод туманлараро судига даъво ариза киритдик. Суднинг ҳал қилув қарорига кўра, буйруқ бекор қилинди. Шунингдек, иш берувчи зиммасига Ф. Нормуродовага 6 миллион сўм маънавий зарар тўлаш мажбурияти юклатилди.

Зариф Холов

Ўзбекистон касаба уюшмалари Федерациясининг Сурхондарё вилояти кенгаши меҳнат ҳуқуқ инспектори