Previous Next

20.03.2023. Фарғона вилоятидаги “Само” спорт мажмуасида Мактабгача ва мактаб таълими вазирлиги, Касаба уюшмалари федерацияси ижроия қўмитаси, Ёшлар сиёсати ва спорт вазирлиги, Ўзбекистон миллий телерадиокомпанияси ҳамкорлигида “Беш ташаббус олимпиадаси” доирасида ташкил этилган Касаба уюшмаси кубоги спорт мусобақаларининг вилоят босқичи бўлиб ўтди.

Қизғин ва муросасиз кечган ўйинларнинг тақдирлаш маросимида вилоят ҳокимининг ўринбосари Файзулло Қосимов, Ўзбекистон касаба уюшмалари Федерациясининг Фарғона вилояти Кенгаши раиси Эркинжон Нуралиев, вилоят халқ таълим бошқармаси бошлиғи Шерзод Долимов, вилоят ёшлар сиёсати ва спорт бош бошқармаси бошлиғи Нодиржон Ҳакимовлар иштирок этиб, барча устозларни яқинлашиб келаётган Наврўз байрами билан табриклаб, мусабақалардаги фаол иштироклари учун миннатдорлик билдирдилар.

Мусобақа якунига кўра стол тенниси бахсида эркаклар ўртасида 1-ўрин Учкўприк тумани 56-мактаб ўқитувчиси Диёрбек Миролимовга, аёллар ўртасида Фарғона шаҳар 21-мактаб ўқитувчиси Нилуфар Сулаймоновага омад кулиб боқди.

Шашка мусобақасида ғолиблик эркаклар ўртасида 1-ўрин Олтиариқ тумани 42-мактаб ўқитувчиси Шерзод Турдибоевга, аёллар ўртасида эса Фарғона тумани 58-мактаб ўқитувчиси Маҳлиё Тошпўлатовага насиб этди

Миллионлар ўйини бўлган футбол мусобақасида Фарғона шаҳар жамоаси барча рақибларини енгиб ғолибликни қўлга киритди.

Ақл гимнастикаси ҳисобланган шахмат мусобақасида эркаклар ўртасида  1-ўрин Қува туман 2-мактаб ўқитувчиси Умиджон Сотволдиевга, аёллар ўртасида бахсда шу туманнинг 64-мактаб ўқитувчиси Гулхумор Абдураимовага ғолиблик насиб этди.

Волейбол мусобақасида Риштон туманидан ташриф буюрган аёллар жамоаси финалда ғалаба қучиб, мусобақа ғолибига айланди.

Касаба уюшмаси кубоги эса энг юқори кўрсаткични қўлга киритган Риштон тумани устозларига насиб этди. Шунингдек уларга 30 миллион сўм пул мукофоти тантанали равишда топширилди. Шунингдек, ғолиб ва совриндорларга диплом, медаль ва эсдалик совғалари топширилди.

Шоҳсултон Тўхтаматов

Ўзбекистон касаба уюшмалари Федерациясининг Фарғона вилояти кенгаши раисининг Ёшлар масалалари бўйича маслахатчиси