Previous Next

22.04.2025. Жорий йил — Ўзбекистонда касаба уюшмалари ҳаракатининг юз йигирма йиллик юбилейи сифатида муҳим тарихий босқич сифатида қайд этилмоқда. Бу сана муносабати билан юртимиз бўйлаб маърифий, маданий ва спорт тадбирлари кенг кўламда ўтказилаяпти. Хусусан, 21–27 апрель кунлари «Ўзбекистон таълим ва фан ходимлари касаба уюшмаси ҳафталиги» доирасида таълим муассасаларида қатор ташаббуслар амалга оширилмоқда.

Ҳафталикнинг дастлабки куни Бухоро вилоятида жойлашган, ўзининг табиий гўзаллиги ва шинам муҳити билан машҳур бўлган “Варнет” ботаника боғида ўзига хос маънавий байрам — “Заковат” интеллектуал ўйини бўлиб ўтди. Бу ғоявий-маърифий тадбирда вилоятнинг турли таълим муассасаларида фаолият юритаётган педагоглар ва касаба уюшмаси фаоллари иштирок этди.

Тадбирнинг очилиш маросимини Таълим ва фан ходимлари касаба уюшмаси Республика кенгаши раиси Равшан Бедилов очиб берди. У ўз сўзида бу каби тадбирлар инсон салоҳиятини ривожлантириш, жамоавий фикрлашни кучайтириш ва ижтимоий бирликни мустаҳкамлашда муҳим ўрин тутади, деб таъкидлади.

Ўйин жараёнида 16 та жамоа — жами 96 нафар билимдон ўзаро ақл ва заковатда беллашди. Улар савол-жавоблар орқали нафақат ўз билимларини намоён этдилар, балки мамлакатимиздаги касаба уюшмалари тарихи, меҳнат қонунчилиги, ижтимоий-иқтисодий жараёнлар ва маънавий ҳаётга оид билимларини ҳам синовдан ўтказишди.

Беллашув якунида Олот тумани шарафини ҳимоя қилган “Sapiens” жамоаси биринчи ўринни қўлга киритди. Бухоро туманининг “Бухорий издошлари” ва Қоракўл туманининг “Таянч” жамоалари эса муносиб равишда иккинчи ва учинчи ўринларга сазовор бўлди. Ғолиб жамоалар ташкилотчилар томонидан фахрий ёрлиқлар ва қимматбаҳо эсдалик совғалари билан тақдирландилар.

Тадбирнинг ижобий жиҳатларидан бири шундаки, у рақобат руҳида эмас, балки дўстона муҳитда, ўзаро ҳурмат ва ҳамжиҳатлик асосида ўтди. Бу эса ўқитувчи ва педагогларнинг фақатгина билим эмас, балки маданият ва инсоний фазилатлар соҳасида ҳам юксак салоҳиятга эга эканини яна бир бор кўрсатди.

Р. Носирова

Ўзбекистон таълим ва фан ходимлари касаба уюшмаси Республика кенгашининг Бухоро вилояти бўйича масъул ташкилотчиси