Previous Next

24.07.2025. Жорий йилнинг 23 июль куни Тошкент давлат иқтисодиёт университетининг мажлислар залида Ўзбекистон таълим ва фан ходимлари касаба уюшмаси Республика кенгаши ижроия қўмитасининг навбатдаги 16‑мажлиси бўлиб ўтди.

Йиғилишни Ўзбекистон таълим ва фан ходимлари касаба уюшмаси Республика кенгаши раиси Р. Бедилов олиб борди. Унда Республика кенгаши раҳбарияти, аппарат ходимлари, Ижроия қўмитаси аъзолари ҳамда ҳудудлар бўйича масъул ташкилотчилар иштирок этдилар. Мажлис давомида кун тартибига киритилган бир қанча муҳим масалалар, жумладан тизим фаолиятини такомиллаштириш, ходимларнинг ижтимоий‑иқтисодий ҳимоясини кучайтириш ва келгусидаги вазифалар атрофлича муҳокама қилиниб, тегишли қарорлар қабул қилинди.

Йиғилишнинг расмий қисмидан сўнг тантанали тадбирлар ўтказилди. Дастлаб, «Меҳнат муҳофазаси ва хавфсизлиги бўйича жамоатчилик назоратини ташкил этиш юзасидан Республика кўрик‑танлови» якунлари сарҳисоб қилинди. Танловда юқори натижаларни қайд этган ғолибларга Республика кенгашининг дипломлари ҳамда қимматбаҳо совғалари топширилди. Ушбу тақдирлаш маросими меҳнат муҳофазаси каби муҳим йўналишга қаратилаётган юксак эътиборнинг яна бир исботи бўлди.

Шундан сўнг Ўзбекистон таълим ва фан ходимлари касаба уюшмаси Республика кенгашининг Фарғона вилояти бўйича масъул ташкилотчиси билан хайрлашув маросими ўтказилди. Ушбу масъул ходим Ўзбекистон касаба уюшмалари Федерациясининг Фарғона вилояти кенгаши раисига ўринбосар этиб сайланганлиги муносабати билан эгаллаб турган лавозимидан озод этилди. Республика кенгаши раиси Р. Бедилов унинг кўп йиллик самарали фаолиятини эътироф этиб, келгуси ишларига муваффақиятлар тилади. Унга Республика кенгашининг ташаккурномаси ва қимматбаҳо совғаси топширилиб, илиқ сўзлар ва юксак эҳтиром билан янги масъулиятли лавозимга кузатиб қўйилди.

Бир кунда ҳам муҳим қарорлар, ҳам тақдирлаш ва эҳтиром маросимларини ўзида жамлаган ушбу тадбир касаба уюшмаси тизимидаги ҳамжиҳатлик ва инсон қадрини улуғлаш тамойилларининг ёрқин намунаси бўлди.