Previous Next

03.09.2025. 2025-йил 28-июль куни “Қашқадарё пармалаш ишлари” АЖнинг жами 18 нафар ишчи-ходимлари Ўзбекистон касаба уюшмалари Федерациясига жамоавий мурожаат йўллади. Мурожаатда ишчиларнинг икки ойдан бери ойлик маош олмагани, оммавий ишдан бўшатиш жараёнидаги қонунбузарликлар ва меҳнат шартномаларига оид бошқа муаммолар акс этган эди.

Мазкур мурожаат юзасидан Ўзбекистон энергетика, нефть-газ ва геология ходимлари касаба уюшмаси Республика кенгаши вакиллари корхонада бўлиб, ходимлар ва иш берувчи билан бевосита учрашув ўтказдилар ҳамда муаммоларни батафсил ўргандилар. Ўрганишлар жараёнида Республика кенгаши Меҳнат инспекцияси ва Ижтимоий ҳимоя бўлими масъул ходимлари, шунингдек, Ўзбекистон касаба уюшмалари Федерациясининг Қашқадарё вилояти кенгаши вакиллари иштирок этди.

Шу ўринда ишчилар норозиликларининг асл сабабларига тўхталсак: мурожаатчилар иш берувчи томонидан юборилган оммавий ишдан бўшатиш ҳақидаги огоҳлантириш хатларини ноқонуний деб ҳисоблашларини, уларга июнь ва июль ойлари учун иш ҳақлари тўланмаганини, оилавий шароитлари оғирлиги ва айни кунда янги иш топа олмаётганларини билдирдилар.

Иш берувчи билан ўтказилган суҳбат асносида аниқланишича, “Қашқадарё пармалаш ишлари” АЖ директори С. Назаров мазкур лавозимга яқинда тайинланган. Шунингдек, корхонанинг солиқ ва кредиторлар олдида катта қарздорлиги мавжудлиги маълум бўлди. Иш берувчи ҳозирда “Стандарт Плюс” корхонасидан маблағ тушиши кутилаётганини ва ушбу маблағ биринчи навбатда ишчиларнинг ойлик иш ҳақларини тўлашга йўналтирилишини билдирди.

Ходимлар ва иш берувчи билан ўтказилган суҳбат жараёнида тармоқ касаба уюшмаси Республика кенгаши Меҳнат инспекцияси бошлиғи ўринбосари — бош меҳнат ҳуқуқи инспектори Б. Абдуллаев ходимларга берилган огоҳлантириш хатлари Меҳнат кодексининг 161-моддасига асосланиб чиқарилган буйруққа таянишини билдирди. Шунингдек, меҳнат шартномасини бекор қилиш тартиби, моддий ёрдам ва имтиёзлар юзасидан батафсил ҳуқуқий тушунтиришлар берилди.

Ўрганишлар давомида жамиятда 1,85 миллиард сўм миқдорида иш ҳақи қарздорлиги мавжудлиги аниқланди. Шу боис иш берувчи билан “Йўл харитаси” тузилиб, мазкур қарздорлик 2025-йил октябрь ойигача ойма-ой тўлиқ қоплаб борилиши белгилаб олинди. Шунингдек, ходимларни ишдан бўшатишда уларнинг оилавий шароити ҳисобга олиниши бўйича келишувга эришилди.

Йиғилишда айрим ходимларнинг шахсий муаммолари, жумладан, пенсия ёшига яқинлашганларни имтиёзли пенсияга чиқариш, суд қарорларининг ижросини таъминлаш, кам маошдан норозилик, ногирон фарзанди бўлган ходимнинг иш жойида қолдирилиши масалалари ҳам кўриб чиқилди. Ушбу масалалар юзасидан ҳар бир мурожаатчига ҳуқуқий тушунтиришлар берилиб, айрим ҳолатларда касаба уюшмаси томонидан амалий ёрдам кўрсатилди.

Ўрганишлар якунига кўра “Қашқадарё пармалаш ишлари” АЖ раҳбариятига ишчи-ходимларнинг 1,85 миллиард сўмлик иш ҳақи қарздорлигини тўлаш ва иш ҳақларини ўз вақтида тўлиқ бериш чораларини кўриш юзасидан Меҳнат инспекциясининг расмий кўрсатма хати киритилди.

Натижада, касаба уюшмалари саъй-ҳаракатлари билан иш берувчи томонидан 2025-йил 12-август куни 202 миллион сўм, 15-август куни 523 миллион сўм, 28-август куни эса 630,6 миллион сўм, жами 1,35 миллиард сўмлик иш ҳақи қарздорлиги ишловчиларга тўлаб берилди. Айни дамда қолган қарздорликни бартараф этиш бўйича чоралар кўрилмоқда.

Қайд этиш зарурки, касаба уюшмалари вакиллари бундан буён ҳам ходимларнинг меҳнат ҳуқуқлари таъминланиши юзасидан қатъий назоратни амалга оширадилар. Келиб тушаётган мурожаатлар тизимли равишда ўрганилиб, меҳнаткашларга амалий ёрдам кўрсатилади.

Ўзбекистон касаба уюшмалари Федерацияси Матбуот хизмати