Previous Next

11.12.2025. Навоий шаҳридаги 23-сонли мактабда “Китобхонлик фестивали”нинг тақдирлаш маросими бўлиб ўтди. Вилоят Мактабгача ва мактаб таълими бошқармаси ҳамда Ўзбекистон касаба уюшмалари Федерациясининг Навоий вилоят Кенгаши ҳамкорлигида бўлиб ўтган ушбу маънавият тадбирида вилоят Кенгаши раиси ўринбосари Хуршид Халилов сўзга чиқиб, китобхонликни янада кенг тарғиб қилиш, ўқувчилар билан бир қаторда ҳар бир педагогнинг китобхон бўлиши зарур эканини алоҳида таъкидлади.

Фестивалда барча туман ва шаҳар болалар кутубхоналари директорлари, китобхон оила вакиллари ва ота-оналар иштирок этишди.

Фестивалнинг асосий вазифалари – ёш авлоднинг китоб ўқишга бўлган қизиқишини янада кучайтириш, китобхонларни маънавий ва моддий рағбатлантириш, фаол китобхонлар сафини кенгайтириш; ҳудудларда ёзувчилар, шоирлар ва олимлар иштирокида китоб байрамлари ва ярмаркаларини ташкил этиш, аҳоли ўртасида миллий ва жаҳон мумтоз адабиётининг юксак намуналарини тарғиб қилиш, республиканинг чекка ҳудудларида китобхонлик маданиятини ривожлантириш ва китобхонлик маданиятини оширишга доир тарғибот ишларини тизимли ва самарали ташкил этишдан иборат.

“Китобхонлик фестивали” доирасида вилоят бўйича “Ижодкор болалар”, “Энг фаол китобхон ўқувчи”, “Энг фаол кутубхоначи”, “Энг китобхон оила”, “Энг китобхон мактаб” кўрик-танловларида жами 12 мингдан ортиқ ўқувчилар қамраб олиниб, 25 нафар ғолиб ва совриндорлар ҳамкор ташкилотлар ҳамда вилоят касаба уюшмаси томонидан диплом ва қимматбаҳо совғалар билан мукофотланди.

Дилрабо куй-қўшиқлар ва ўқувчи-ёшларнинг қувноқ рақслари тадбирга янада мазмун ва байрамона тантанаворлик бахш этди.