Previous Next

13.03.2026. Пайшанба — Ёшлар куни муносабати билан Самарқанд вилоятида ёшларнинг интеллектуал салоҳиятини ошириш, уларнинг билим ва тафаккурини ривожлантириш ҳамда бўш вақтларини мазмунли ташкил этиш мақсадида “Заковат” интеллектуал ўйини ўтказилди.

Тадбир Ўзбекистон касаба уюшмалари Федерациясининг Самарқанд вилояти Кенгаши, Маданият, спорт ва туризм ходимлари касаба уюшмаси вилоят бирлашган қўмитаси ҳамда Ёшлар ишлари агентлиги Самарқанд вилояти бошқармаси ҳамкорлигида ташкил этилди.

Интеллектуал ўйинда Ёшлар ишлари агентлиги тизимида фаолият олиб бораётган ёшлар етакчиларидан иборат 14 та жамоа иштирок этди. Улар тарих, адабиёт, маданият, фан-техника ва замонавий билимларга оид саволлар асосида ўзаро беллашди.

Тадбирнинг очилиш қисмида Ўзбекистон касаба уюшмалари Федерациясининг Самарқанд вилояти Кенгаши раиси Сухроб Рафиков бундай интеллектуал ўйинлар ёшларнинг билимга бўлган қизиқишини ошириш, уларнинг дунёқарашини кенгайтириш ва иқтидорини намоён этишда муҳим аҳамиятга эга эканини таъкидлади. Шунингдек, ёшларни қўллаб-қувватлаш, уларнинг ташаббусларини рағбатлантириш ва жамоавий муҳитни мустаҳкамлашда бундай тадбирлар муҳим ўрин тутишини алоҳида қайд этиб, барча жамоаларга омад тилади.

Интеллектуал беллашув давомида иштирокчилар ўз билим, тезкор фикрлаш ва жамоавий ишлаш қобилиятларини намоён этди. Қизғин ва муросасиз кечган баҳслар тадбир иштирокчиларига юқори кайфият бағишлади.

Интеллектуал ўйин якунларига кўра:
1-ўрин — Жомбой тумани жамоаси
2-ўрин — Тойлоқ тумани жамоаси
3-ўрин — Самарқанд шаҳар жамоаси

Ғолиб жамоалар касаба уюшмаларининг эсдалик совғалари ҳамда дипломлар билан тақдирланди.

Тадбир иштирокчилари бундай интеллектуал беллашувларни келгусида ҳам мунтазам равишда ташкил этиш ёшлар учун катта рағбат бўлишини таъкидладилар.