Previous Next

08.04.2026. Каримжон Қурбонов ҳамда Хуррамбек Ўлмасов кўп йиллар давомида Қува тумани мактабларида чақирувга қадар бошланғич тайёргарлик раҳбари сифатида фаолият юритиб келаётган эди.

Бироқ кутилмаганда Қува тумани Мудофаа ишлари бўлими томонидан улар билан тузилган меҳнат шартномаси бир томонлама бекор қилинди. Иш берувчининг важи сифатида ҳар икки ходимнинг “етарли малакага эга эмаслиги ва меҳнат интизомини мунтазам бузгани” кўрсатилди.

Ўз ҳуқуқларини яхши билган устозлар адолат излаб Ўзбекистон касаба уюшмалари Федерациясининг Фарғона вилояти кенгашига мурожаат қилишди.

Меҳнат низоси судгача етиб борди. Маълум бўлишича, иш берувчи ходимларни ишдан бўшатишда энг асосий талаб — касаба уюшмасининг розилигини олишни “унутган”.

Ваҳоланки, туман Мудофаа бўлимининг жамоа шартномасида иш берувчи ташаббуси билан меҳнат шартномасини бекор қилишда касаба уюшмасининг хулосаси олиниши шартлиги аниқ белгилаб қўйилган.

Судда иш берувчи чиқарган буйруқнинг қонунийлигини на ҳужжатлар, на мантиқий далиллар билан исботлай олди.

Суд қарори билан адолат тикланди. Қува тумани Мудофаа ишлари бўлимининг буйруғи ғайриқонуний деб топилиб, бекор қилинди.

Шу тариқа Каримжон Қурбонов ва Хуррамбек Ўлмасов ўз иш ўринларига тикланди.

Мажбурий прогул кунлари ва маънавий зарар учун иш берувчи ҳар бир ходимга 20 млн 402 минг сўмдан, жами 40 млн 804 минг сўм товон пули тўлашга мажбур этилди.

Мансуржон Усмонов

Ўзбекистон касаба уюшмалари Федерацияси Фарғона вилояти кенгаши бош юрисконсульти