30.12.2015. Болажонлар учун Янги йил байрами тантаналарининг янада мазмунли ва қизиқарли ўтказилиши учун касаба уюшма ташкилотлари ҳам ўз муносиб ҳиссасини қўшмоқда.

Тошкент вилояти касаба уюшмалари ташкилотлари бирлашмаси Кенгаши томонидан Чирчиқ шаҳридаги 15-сонли Меҳрибонлик уйида ўтказилган байрам тадбирига Ватанимиз тинчлиги ва сарҳадларимиз дахлсизлигини таъминлаш йўлида хизмат бурчини бажариш чоғида қурбон бўлган ҳарбий хизматчилар, ҳуқуқни муҳофаза қилиш идоралари ходимларининг фарзандлари ҳам таклиф этилди. Тадбирда болажонлар учун Қорбобо ва Қорқиз, севимли эртак ва мультфильм қаҳрамонлари иштирокида театрлаштирилган дастур намойиш қилинди. Тадбир сўнгида ўғил-қизларга касаба уюшмалари томонидан Янги йил совғалари топширилди.

Ҳудди шундай тадбир Чирчиқ шаҳридаги 14-сонли Меҳрибонлик уйида ҳам ташкил этилди. Унда 98 нафар болажонлар янги йил совғаларини олдилар.

Шунингдек, янги йил байрами муносабати билан “Ёшлар ижод саройи”да ташкил этилган “Мўжизалар шаҳри” номли театрлаштирилган байрам томошасига вилоят касаба уюшмалари ташкилотлари бирлашмаси томонидан вилоят меҳнаткашлари фарзандларининг ташрифи уюштирилди.